上回講到陸先生開出「320萬」呢口價先肯承接舖位，May的心情即時由天堂掉落地獄，崩潰淚灑當場，而且失去扯單的鬥志。我立即對May 當頭棒喝，盡快將她由黑暗的深淵拉回現實，並命令她馬上致電業主「報喜」。
「李小姐，恭喜你，啱啱收咗張票啦，保證你滿意，你位置喺邊？我過嚟搵你。」我吩咐May一字不改地說。李小姐聽完之後愉快地相約我們在城市大學見面。收線之後，May面有難色。「唔使驚，淡定喎！業主係鬧都鬧我先啦! 」我輕輕拍一拍May的肩膊安撫她。
轉眼到目的地，不久一位打扮光鮮亮麗、穿戴合時嘅中年女士漫步跑出來。May快步迎上點頭，並介紹道：「李小姐好，呢位係我上司，Dennis。」
正打量着李小姐嘅我保持微笑，即時快步遞上卡片：「李小姐好，非常榮幸今日見到妳，不如我哋搵個地方坐低先傾啦！」「隔離公園有張長櫈可以坐低嘅」李小姐笑住口話。閒談幾句後，得知原來李小姐在城大教書，剛剛下課和朋友「hi tea」。「咁唔阻你咁耐喇，我哋即時解釋合約畀你聽先。」我說。
醜婦終須見家翁，降臨地獄時刻到了！
May緊張到全身繃緊，我隨即打開合約，手指着地址欄位，望着李小姐道：「呢個就係物業地址……」話未說完，李小姐突然起身，一言不發就以時速九秒九的速度暴走，想必是快眼望到成交金額，怒而離去。我即時尾隨叫喊：「李小姐、李小姐」，對方沒有停下的意欲。我續喊：「睇在耶穌份上，請你停低聽我講一句先！」結果神奇的事情發生，李小姐真係停低擰轉頭，憤怒地問：「點解你哋要呃我到價！」
「大家都係弟兄姊妹，我唔會呃你嘅，只係為咗見妳一面，用左少少『言語技巧』啫。」我解釋道：「首先，由頭到尾我哋都冇講過客人畀380萬，況且今天市況咁差，能成功收到支票、合約已經超滿意。」
「320萬呢口價，其實係個客要求我哋去試，皆因而家正值金融海嘯時期，全世界都有危機，市場根本冇乜客會出來買舖，錯過咗好大機會冇得返轉頭。其實個客有更靚嘅舖位選擇，都係差唔多價錢，但好神奇地佢只鍾情你呢個舖，我覺得呢個可能係神嘅指引，送畀李小姐嘅恩典。」李小姐默默聽着，我當然乘勢而上：「我相信走向每條路係有神的安排，所以引領我嚟同李小姐見面，我保證現今市況以呢口價賣出係市場最好嘅價錢。順利成交咗之後，可以利用呢筆錢去換更靚街嘅舖位博升值，信我啦，唔好錯過機會，都係嗰句，今日低位其實係明日嘅高價！」
李小姐開始慢慢平靜落嚟，劈頭一句就問，「你點知我係基督徒？」我微笑回應：「相信基督嘅弟兄姊妹們，通常都會由內而外散發出一種聖潔的感覺。剛才與李小姐初次見面，我就有相樣的感受，所以就斗膽猜想你係基督徒。我有冇估錯？」李小姐說：「一睇就知我信神？」我微笑點頭，李小姐也終於解除戒備地說：「好，我相信你，但成交咗之後，你要介紹啲靚嘅街鋪我買！」
如是者我們很快簽妥合約，比埋支票業主簽收，終於完成交易！May旁觀整個過程一言不發，只係默默望着我倆傾談。
當李小姐離開之後，May急不及待問：「點解你會知道佢係基督徒？」我故作神秘地吐出四個字：留意細節。
「我留意到李小姐胸口戴住一個微細嘅十字架，所以猜想佢係基督徒。基督徒多相信恩典、神的指引，亦十分虔誠，相信耶穌引導行每一條路，所以經常留意細節，分分鐘可以在緊急之際發揮作用。」May大力點頭道：「又學到嘢！以後我都要留意所有細節先得!」她續道：「我覺得好神奇，心諗呢單嘢一定做唔到，好多謝你！」
「小May，經過今次你要記住：『如果你負面，神救唔到你。如果你堅持，絕處都會逢生』，與其埋怨工作冇成績，不如諗一諗方法係咪有問題？」經過幾日勞碌，大家都饑腸轆轆，「肚餓啦，食啲嘢補充下能量先！」我輕快地講。「冇問題，我請！但其實老細，你係咪真係基督徒？」May 一臉好奇。「仲問？我梗係信神啦，佢幫我開到單！」我笑住回應。
(完)
鄭得明 利嘉閣地產商舖部高級營業董事
重溫上集：
——————
