上集講到James單舖位買賣困在樽頸位，心裏千萬種負面思緒襲來，尤其對比之前順風順水的風光日子，最終招架不住，求助於我。
「定啲嚟，你冷靜地聽我分析先。」我徐徐道出：「向好嘅方面睇，兩個都主動答應咗畀1%佣金先，聽返你講，最大問題係雙方都覺得你幫晒對家，其實我創立咗一套論述，可以同時應用喺買賣雙方都啱聽嘅。」
James張大雙眼道：「竟然有咁神奇？！教下我啦老細，等我mark低佢先，最多事成後請你去食爭鮮！」
人天生喜歡吊人胃口，望着James滿臉焦急的神情，我暗笑並慢慢道出：「你實牙實齒對Donald講──業主可以傾平幾多價，我一定同你傾到盡。全港舖位超過10萬個盤，你唔傾呢間，都會跟我傾第二間舖，市場大把靚舖揀，任君選擇。但買舖貴客一個就一個，如果Donald你買得開心又滿意，再介紹埋差唔多級數嘅朋友齊齊跟我買舖，咁我就發達啦！
況且傾平啲價，佣金都只係爭少少，對我哋嚟講冇乜所謂，最緊要幫到你搵啱心頭好，而且市場資訊咁透明，揸高你價錢，遲啲你一定知，等於拿石頭揼自己腳，同自殺冇分別。
而家世界唔同晒，社會進化到講緊元宇宙了，家陣經紀提供服務，係要超越客人期望，務求令客戶有驚喜為止，否則我哋唔值得攞你1%佣金。」
James點頭：「嘩！貴客聽到絕對認同啦。咁業主又點樣用同一番說話講呢？」
我眼神一轉：「聽住啦，你對業主講──個客畀到幾多價，一定竭盡所能幫你揸盡出來。原因係如果個客俾唔到：
1.生意做唔成
2.就算你最終肯賣出，可能佣金都畀唔多（要減佣）
3.你賣咗嘢，一定會再搵舖買。如果你唔滿意我，就唔會再幫襯小弟買返舖，變相唔見咗兩單生意。
如果你覺得我幫到手，現持有的靚舖都可能優先畀我做，又多啲獨家盤搞。客人就通街都係，業主個靚盤就只得一個，我又點敢揸你價呢？況且做高的價錢，我都收多啲佣金啦，我都冇誘因想賣平啲㗎。家陣市場咁透明，賣平咗你一定知，其他經紀都會問你點解賣咁平走，是否等錢洗？係就幫你蝕走其他舖位。
再深入分析得失，客人買咗舖位，就暫時冇錢再買其他嫁啦，你賣出咗就一定會再搵舖投資，合邏輯地去諗，你係我會點做先？唔使講一定幫晒業主你啦。你賣唔出我變相做唔成起碼兩單生意以上，你諗我有冇咁笨先？」
James此時表情呆呆地，微微張開口，讚歎地道出：「差唔多內容，原來可以演化出兩個唔同版本，對買方賣方都好似度身訂做咁，非常好用！我即刻諗下點樣去打呢個電話先，謝謝你！」跟手揸住本簿，又彈又跳入房閉關。
過左足足3個鐘後，見佢笑笑口望住我，「皇天不負有心人，憑你教我嘅說話，先融會貫通納為己用，再以影帝級嘅聲線同超認真嘅態度，分別向買賣雙方演繹，對方態度果然變得親切，感受到我同佢係同一陣線，而家買賣雙方都諗緊我提議嘅方案！」James好開心地講。
見到佢成個人輕鬆返晒，我笑着回答：「不枉你用咗足足三小時，費盡心機同買賣雙方糾纏。」
「三個鐘？！乜唔係一陣間咋咩？」James一臉驚訝說：「都只係同業主和Donald兩位傾咗一陣，分別講咗你教我嗰番肺腑之言，竟然咁快就過咗三小時！」
我搖着頭道：你真係快樂不知時日過，證明你剛才傾得真係太開心。
James迷惘地搔着頭又行返入房再傾。直到晚上，突然好興奮出嚟叫嚷：「終於傾掂咗單嘢，業主肯接受銀行估價2,300萬之餘，再減至2,280萬，但係要Donald連埋維修令一併購入，減多咗20萬樓價係畀Donald將來清除維修令費用了咗件事。而Donald覺得咁樣買入好舒服喎，因為未來市況升咗有利潤就會沽出，到時可能維修令都仲未需要夾錢做，起碼慳咗20萬樓價先。老細，我而家去Donald屋企收票，咁你……？」
「梗係一齊去啦！」我爽快回應。如是者第一單買賣舖就咁完成咗。
當簽妥合約離開業主屋企後，James喃喃自語：呢單嘢真係「有得有失」！「有得就係啫，你失咗乜嘢？」我疑惑地望住佢。「當一個人『得』咗錢之後，佢同時都『失』咗好多煩惱！」James調皮向我單一單眼同時喊着：「去消夜，我請……」
P.S.之後業主未等到成交日收埋尾數，就急不及待跟James連環購入兩間約1,000萬舖作收租用途，過幾年後升咗值又經James逐一賣出；而貴客Donald買入舖位一年後，連埋維修令以2,800萬獲利沽出，之後又跟James買咗個近4,000萬核心舖長揸。兩個當正James係御用經紀，主要係源於當初James嗰套「幫晒你」同一陣線論述，證明說話技巧係幾咁重要。
鄭得明 利嘉閣地產商舖部高級營業董事
