中國噚日降準25點子，加上國統局公佈一連串經濟數據勝市場預期，港股都只係反彈唔夠1%咁大把。首先點都講啲好嘢出嚟打吓J、助吓慶先，中國消費及工業數據的確比預期好，8月社會消費品零售總額按年升4.6%，勝預期嘅3%，按月都反彈3.7%；工業增加值按年升4.5%，勝預期嘅3.9%；失業率亦由5.3%回落至5.2%。
數字反映經濟單月全面地輕微反彈，不過，仲有兩項隱藏數據，公開地顯示中國經濟困局，呢兩項數據相對影響長遠經濟，可能呈現嘅惡性循環仲未完全浮現，亦唔似短期內會有扭轉。
固投低迷拖累就業
第一項數據，係固定投資數據，8月份新增固定投資4.11萬億，比7月嘅4.28萬億下降4%；至於8月民間固投新增投資2萬億，相比7月嘅2.08萬億同樣萎縮4%。投資已經持續放緩，仲會反映喺未來嘅就業情況。與此同時，中國新增投資較着重國產替代，而國產替代本身係唔會為現有產品帶來升級，而欠缺新產品升級，就自然難構成消費升級，較大機會令民間冇錢值得花，從而減少消費、繼續儲錢，經濟動力減慢。
住房供應逆市增加
第二項數據，係8月住宅新開工面積以及竣工面積。首先新開工面積6,922萬平方米，比7月嘅7,089萬降低，而8月竣工面積3,821萬平方米，相比7月上升14%。竣工面積急升唔清楚係咪同保交樓有關，但數字仍遠比新開工面積為低，反映未來起碼一兩年，供應仲會繼續增加，喺樓價向下、信心偏弱之下，供應仍完全剎唔到車，壓力似乎有排未見底。如果好似香港咁，樓價下跌嘅話，發展商都起碼識得起少啲樓、賣少啲樓，呢個調節機制似乎喺大陸係無法出現。
其實上個月尾聲勢浩大嘅「認房不認貸」政策推出之後，即使係一線樓市都只係好返一個周末日，開價嗌返高少少，其後就已經缺乏買家跟進，市況已變返靜。
再講，即使房地產市場已萎縮，房地產以及周邊行業佔GDP嘅比重都仲略低於20%，新開工面積持續減少，象徵呢大約六分之一嘅GDP仲會持續萎縮落去，連鎖效應下又再拖累到消費及就業。
三頭馬車有兩頭行唔郁
以前成日講中國經濟靠「三頭馬車」，即係投資、消費、出口。出口十幾年前開始見頂轉弱，然後靠房地產谷起內需，拉長光輝歲月多十年。而家，冇咗房地產嘅助燃劑，連投資都不行了，地方政府又債台高築，最終消費就會成為大考驗。物理學告訴我們，三頭馬車有兩頭行唔郁，最終剩返嗰頭都會被勒住行唔郁。呢個情況下，中國經濟復蘇唔係講緊一個月數據反彈，就能夠睇得到。
在於港股而言，雖然連環好消息只能刺激恒指上升0.75%，但美銀基金經理調查講到，沽空中國成為全球第二擠擁（21%）嘅交易，僅次於Long美國大型科技股（55%），希望總有一日物極必反，令港股弱勢能夠喘定一吓吧。在此祝願港股好運。
https://www.facebook.com/advanceguy1
註：專欄作家言論不代表本網立場
