TVB娛樂新聞台主播吳紫韻（Purple）斥資近1,963萬元買入大埔白石角新盤朗濤一個1,208方呎的三房單位，她接受BossMind訪問表示：「今次都係all in or nothing。」
數日前她於IG出Post透露成功上車，「短短三個月，拍了一生難忘的綜藝節目，入了劇，有自己的公司，有自己的房子。大概實現了自己一半的目標。」據了解，她買入的單位為朗濤9A座低層戶，實用面積1,208方呎，三房間隔，上月中透過招標形式買入，成交價1,963萬元，呎價16,250元。
她接受BossMind訪問，開始談到首次置業，她稱：「以前都係同屋企人一齊投資，自己投資就第一次。（今次）冇屋企人幫，邊有呢個本事，自己冇可能負擔到首期。多謝屋企人，同埋工作上都有好多機會，所以都感恩，今次都係all in or nothing！屋企人畀咗好大嘅支持同幫助我，不過變咗自己要用大部份嘅人工去供樓。」
她續稱：「自己一直都好鍾意同留意樓市，覺得喺香港投資地產係比較實際啲。以往都有啲心水嘅樓盤同埋地區都有升值，所以屋企人都相信我嘅眼光，當係即將踏入30歲嘅禮物，而且都要學識投資同埋擔起自己嘅責任」。
提到工作，她說：「自己有多方面工作，喺疫情期間雖然有影響，但都有好多契機，好似多咗唔同嘅網上工作，再加埋做主持同拍劇（公司都有穩定嘅工作量)，就有比較穩定嘅收入。所以嚟緊都係搏命畀心機做嘢，賺到嘅收入全副身家擺晒入去呢個安樂蝸。」
一般而言，購入1,000萬元或以上單位，最多可借4成，假設她一按借4成，以上述單位為例，息率2.5厘，分30年攤還，每月供款約3.1萬元。
大埔白石角有不少多名人居住，例如王祖藍、陳小春、黎瑞恩及林曉峰等。她直言，睇中白石角發展潛力，「白石角相對香港其他地區算係低水，睇返其他新發展地區好多都係呎價18,000元呎以上，而家呎價16,000元呎嘅全新樓。另外，政府亦提出發展呢度，相信呢區未來有升值潛力。」
