相隔12年，C朗「回家」重投曼聯，作為一個老球迷，嗰種「難得」老土啲講句係「有今生冇來世」，加上之前仲傳緊C朗轉會死敵曼城，一夜間峰迴路轉的神操作，成件事就更加震撼。消息轟動球壇之餘，上周五曼聯（MANU）股價亦一度爆升逾一成，最終收升近6%，以市值計升近13億港紙。當晚亦有不少朋友想不問價衝入場撐C朗，但理性與熱情之間，你會點揀？
C朗在球場上有幾勁就唔多講喇，但其實C朗轉會牽動股價都不是第一次，2018年夏天由皇馬轉會祖雲達斯，同樣刺激祖記股價單日勁升16%，其後一年計更升逾七成；不過，若以上周五股價比較，則已倒跌近15%，但當然好大程度上是因為疫情關係啦。
再講，C朗今年出席歐國盃賽前記者會時，亦曾經將兩支可樂移走，然後舉起一支清水，即時令可樂股價跌近2%，市值蒸發逾300億元，足見其球場外的影響力同樣強勁。
講到呢到，有冇好想魔性澎湃地掃貨呢？但喺「Buy the rumor, Sell the fact」的原則下，現時轉會落實、望住個圖有支針再高追入場短炒，又實在好似太過衝動。
不過，如果曼聯班管理層夠醒，識得效法PSG搞加密貨幣出糧畀美斯咁，再幫C朗出番一系列NFT產品，嘩嘩嘩，咁股價破頂都唔係問題！可惜呢段純屬FF，我都冇電話打畀曼聯，有的話都應該叫佢賣走普巴先，哈。
言歸正傳，咁長揸又點睇呀？雖然美股可以一股一股買，入場費低，但較港股差的地方係，收息要畀30%稅，七除八扣冇咩得剩，我都親身試過，感覺係幾無癮。再爆多樣蠢事畀大家聽，我試過去證券行問「我想提取曼聯實物股票有咩手續」，對方聽完真係呆咗，隔幾秒先話冇呢種服務，事隔多年諗番起都仲有啲尷尬。
所以，支持球隊有好多種方法，又唔一定話要買曼聯股票嘅。我係咪講到好理性呢？Sorry，我冇買到股票，但我決定今年要買曼聯拎英超！
——————
密切留意BossMind動向！立即CLS
