先旨聲明，小妹非財經演員，無意慫恿大家落叠買股票，即引你上車又冇帶你落車嗰隻，只不過呢排坡佬當旺，望住我隻星展集團控股（SGX D05）也沾沾自喜。
金融界的朋友，個個湧去新加坡，一個基金佬早兩個月被新加坡金融公司獵頭，帶埋老婆仔女走；做私募基金嘅舊同學又要啟程去新加坡探路開檔，而五年前沽咗山頂豪宅再換馬到新加坡嘅一位金融高手，剛交番個牌予交易所正式退休，準備年尾飛去新加坡長住，方便出門旅遊嘆世界，就連揭起本Reader’s Digest，都講月尾新加坡Formula One此盛事，我哋就 「傷城故事」。
悶聲發大財
兩年前，身邊朋友都趕開離岸戶口，最快手不外乎在花旗或DBS開戶。同嗰位金融高手傾偈，佢老哥留意到大量資金湧入新加坡，叫我可睇下星展集團盤數。
一揭年報，嘩！2019至2020年間存款大升600億坡元（約3,400億港元）至4,648億坡元，去到2021年存款仲爆上至5,000億坡元。有水自然可以過水濕腳 ，開咗戶口存入銀兩，即是送埋錢俾銀行做生意，而客仔開戶造按揭或兌外幣，點都有生意畀銀行做吓。於是跟做金融嘅姊妹研究此股，一致認為此股有條件慢慢升，又有息派墊住個pat pat，坡紙滙價又穩定，於是齊齊落注。
其實大家都好少掂新加坡股票，冇liquidity之餘，買得落手嘅股票五隻手指數得哂。此股遂成為投資星洲股市之處女作，平均在28至29坡元買入，之後佢又增加派息，最正係冇股息稅嘛，將收到股息再叠上去，舊年股價曾經升至37、38坡元，姊妹們都唔食糊住，待跌至31、32坡元又加注。呢隻股票就好似新加坡嘅生活咁，悶就悶啲，勝在夠穩定。
押注循財 繼續長揸
今年全球債市大冧，家陣滙市又趴街，英鎊、歐元、日圓年頭至今跌十幾廿個%，坡佬奉行穩定壓倒一切，坡元相對跌得少。反而要擔心滙控（005）及渣打（2888）喺英鎊及歐元嘅外滙風險。
講借貸生意，新加坡做石油及天然氣生意，今年亦發過豬頭，星展集團在生意借貸上就不用太擔心，另最大亮點是未來總理Lawrence Wong（黃循財），唔好讀錯人地個名，係「循財」唔係「蠢材」，呢位未來領䄂金融底子厚，淨係睇佢履歷就拋窒你，Wisconsin經濟系畢業，加埋芝大應用經濟學及哈佛公共行政兩個碩士。 唉，真係自慚形穢。唔好誤會，講我自己咋，皆因循財與我同年。
Louise
https://www.facebook.com/louisewong15
註：專欄作家言論不代表本網立場
