上回寫過仿製「富豪飯堂」之疊囍居，引起咗些少迴響。近排喺飲食界有則佳話傳開巷，就係被冠以「香港第一樓面」嘅經理陳年（富豪稱呼他做阿年），喺疊囍居寫咗張廿萬嘅菜單。
阿年喺福臨門嘅同門師兄弟，對佢「刀」功嘆為觀止。在此經濟低迷時刻，竟然可以殺到張廿萬嘅菜單，均投以艷羨目光。
廿萬菜單惹來艷羨
而呢位貴賓就係「電子大王」兼大慈善家顧明均喇，今年77歲嘅佢，自從南太電子（2633）私有化不成後，遂把公司自願清盤，他已很少喺金融界蒲頭，不過佢最出名就係打官司，近排就有單涉及其母校培正的官司開審，呢位闊佬又再現身法院。
顧明均自帶Screaming Eagle
據知，佢老哥到疊囍居請客，帶咗枝有錢都未必買得到嘅紅酒Screaming Eagle，由於產量極有限，拍賣場先至拍得到，所以一律係癲價，尤其Cabernet Sauvignon、Sauvignon Blanc（白酒）仲癲，聽講顧明均飯局「棟」出來嗰枝Screaming Eagle，拍賣價要2萬美金，可能佢都係「鑲咗鋼板任你斬」；招呼過超級富豪嘅阿年又點會唔識貨？呢張菜單又點可以冇番咁上下，否則又點配得起呢枝酒？
兩位「老哥」都七十過外，係疊囍居上演「煮酒論英雄」，一個「晾」酒價，一個「晾」住菜價，見識真正嘅老手過招。呢一餐飯埋單廿萬走唔甩，令淡市中樓面界從業員都screaming。又有食客聽到竊竊私語，估顧明均係咪入股咗Screaming Eagle個酒莊呢？
Louise
https://www.facebook.com/louisewong15
註：專欄作家言論不代表本網立場
