上周股、滙、債市冚包散，啲banker忙乜？通知客人要call loan同埋斬倉囉！凡係股災，富豪都特別心煩氣躁，恐怖過男人更年期！發起爛渣上嚟乜都鬧得出。
咪以為私人銀行家好尊貴，好多時俾個客鬧到冇尊嚴，有位闊佬就同小妹呻氣：「嗰啲banker仲衰過金融撈女！唔係，應該係金融撈乸，好似踩roller咁，跣到你攤攤腰。總之金融乸叫你做long，你調轉嚟做short就啱喇。」
又係嘅，早前5月份左右，就聽到個美資私人銀行家度咗個盤路俾啲客，就係借錢去買美債。咁，怪唔之得上周要call loan補倉咯，累客輸錢，banker都只係講句「真係唔好意思！」之後咪客死客賤。又難怪有錢佬同普通人一樣，輸咗錢要發爛渣。
【錯信banker 有苦自己知】
記得廿幾年前，一位住渣甸山獨立屋女富豪，喺其大宅內閒聊，好自豪告知，謂美資行流行Private Banker即係私人銀行家咁話。
後來，就有位Banker介紹咗隻Sunday電訊佢入股，呢隻由陸恭蕙男友何力勤同埋電訊界風雲人物Rick Siemens一齊打骰嘅電訊股，乘科網水尾上市後，股價幾個月間變成毫子股，此女富豪中伏後，有苦無人訴，鬧爆嗰位現時仍在市場活躍的banker，為佢改花名「馬屎坑」以洩心頭憤。
之後喺金融海嘯前，此女富豪因心臟病發突然過身，最慘係佢生前同銀行簽落accumulator輸幾億，搞到個仔要告上法庭，最終敗訴，真係死無對證喇。
【搵banker出氣兼教仔】
一位出名冇乜品嘅富豪，落叠認購咗一隻民企股，上市後表現麻麻，冇乜升幅咁。個banker都預咗要「跪玻璃」，個富豪當住自己仔女面前，係富豪飯堂鬧到嗰位banker無尊嚴，叮囑仔女要認住呢啲人，額頭鑿住「老千」兩粒字，仲有一句小妹都寫唔出喇……生仔……。
負責在旁招呼嘅企枱，對此情此景依然歷歷在目。其實私人銀行家同推銷員冇乜分別，成日都要搵客，說客搬錢去開戶口。
早幾年，有間美資大行嘅大陸團隊，就聘請咗唔少大陸財經記者做私人銀行家，貪佢哋有大陸富豪人脈，好多時已知身家有幾多，當然包括枱面及枱底嗰啲，仲可能知道有幾多放喺二、三、四奶嗰度，聽講做得好出色，鬼咩，大陸富豪都要搬走啲錢㗎，梗係容易做。
Covid期間，呢間美資行又嘗試開拓空姐轉行做banker呢條線，不過帶個靚靚空姐同個客食完兩餐飯，最終拉唔到客、開唔到單，都係企唔住腳。
有個闊佬比喻啲banker等如酒樓嘅點心妹，廚房入面整咗乜，就叫佢推俾個客啃，即係banker只會將house view背到啷啷上口，有時候可能係銀行自己炒房炒燶咗，質啲客去啃啲貨，呢位闊佬經常罵banker，問我：「點解佢哋咁無恥？鬧極都唔走嘅？」我答：「份人工咁和味，梗係包埋啦。」
Louise
https://www.facebook.com/louisewong15
註：專欄作家言論不代表本網立場
