位處中環蘭桂芳附近，以黑白為主調的咖啡店，外牆上大大隻字寫上「How’s your coffee today？」這間小店，表面上賣咖啡，實際上「掛咖啡賣教育」。這天，就約了創辦人盧炳棠（Tommie），當面問問，他一手創立之Preface Coding及Preface Coffee & Wine，到底咩葫蘆賣咩藥。
Preface Coding主要為編程教育平台，如果你想學寫code，平台可為你找老師，Tommie指出，「preface coffee 越嚟越似咩呢？似我哋嘅Apple Store咁。」咖啡店白天賣咖啡，晚上就變身成工作坊大本營，開講座介紹machine learning、blockchain、NFT入門基礎101，因為他相信「你會有興趣呢聽blockchain 101嘅，咁likely你咪會想報我哋嘅course，我哋就咁樣攞我哋第一班客。」
想吸新客，芸芸餐廳種類，為何偏偏是咖啡？「幾年前發覺我哋個concept好abstract，至少要buy五分鐘嘅時間，先講到呢我哋做緊啲咩畀個客啦，咁有咩情況最容易講到呢？coffee shop。」
高管成重要客源 由天后第一間咖啡店開始，到早前的中環分店，最近再開銅鑼灣店，賣咖啡之餘再賣埋酒，事實證明，呢條橋係work。過去一年，學生人數已過萬，連帶收入亦錄五倍增長，客戶主要分為三批，分別是3至12歲學生、於海外留學之香港學生，以及30至55歲的高級管理人員，「管理層好多時學完佢未必會寫code，好多時候佢係想make到啱嘅decision。今時今日寫個app都幾廿萬，咁其實佢完成個course先係幾萬蚊，慳到嘅錢已經喺返到。」
Preface Coding之經營模式容易理解，老師上門教學劃一收費每小時800元，網上授課則為680元，平台再按老師資歷分成後出糧，「可以話貴，咁睇下我哋用咩嚟比啦，因為我學琴、游水一對一的話，或者去做瑜珈、做gym，one-to-one私人教練都係呢個價錢，仲有要睇我哋係咩人教coding啦。」
老師月入可達5萬元 平台的老師來自五潮四海，有大型科企程式員、飛機師等專業人士，目前有約500名活躍老師。他舉例指，曾經有一名大學生，於疫情期間毋須返校，結果每日教6小時，做足22日，月薪已達5萬元。
平台對老師的吸引力，金錢以外就是令他們「唔使煩」，「呢一班老師，你當佢係一啲知識分子嘅中產，佢哋其實係想星期六老婆喺利園行街，咁就教兩個鐘，500蚊個鐘，咁有成千蚊，嗰個嗰日嘅dinner就係靠佢兩個鐘嘅收入喇。佢哋係唔會因為可以賺多幾十蚊一個鐘，而佢自己要處理啲customer service，自己要做新筆記。」
Pitch 提起筆記，此份筆記亦另有玄機。每一學生的筆記，都是度身訂造。平台將教學內容碎片化，再由電腦程式去抽出適合該學生的章節，製作成筆記，「我哋就將所有嘅user擺喺電腦比對，我呢個客好似我東京嘅嗰個喎，咁既然係咁，我就邊份筆記啱東京個客，我哋就send畀香港嘅呢個學 生。」 有橋加落到地，公司早前完成A1輪融資，最新阿里巴巴創業基金，亦成為其中一位新投資者。
成功pitching忌賣空氣
Tommie認為，今時今日要成功pitch funding，不可以再「賣空氣」，「以前嘅氣氛係，我會攞到幾多，user呢個user in the long run帶到幾多錢畀呢間公司，咁其實今時今日都一樣，不過依家我就唔再講5年後呢個客先至開始畀錢你，我要呢段時間個客都已經畀緊錢你啦。」
講到未來願景，他期望Preface未來可成為全世界十大，甚至三大編程教育平台。他信心滿滿，源於此經營模式他已經親身試過，而且非常成功。早於他修讀PHD時，他已不停去幫人補習，「當時我喺英國，一個月可以搵幾廿萬，因為一個客畀150至200鎊一個鐘，我又勤力喎，我做8至10個鐘，咁一日千幾磅，既然係咁咪寧願唔讀書。咁總之我考試自己搞掂得㗎啦，最緊要我啲客仔佢哋考試ok，呢筆咪就係我嘅angel money。」
他期望Preface上的老師，都可以有這種財務自由，「我覺得真正暢遊世界嘅passport，係你喺每一個地方都搵到錢，每一個地方你都可以生活到，咁你就變咗我唔鍾意邊個城市，我就離開嗰個城市，我鍾意邊個城市，我就進入嗰個城市。」
BossMind記者
