英國突然間喺英倫海峽對面搞緊巴黎奧運嘅時候，全國上上下下出現大大小小嘅騷亂，呢個混亂嘅狀況好耐冇喺大不列顛帝國見到，咁啱有位喺英國土生土長嘅朋友嚟到香港，同我詳細講咗當地草根階層面對嘅問題。
係講呢位老外朋友嘅一線分析之前，呢排嘅騷亂令我想起一本Eric Hoffer寫嘅書，中文翻譯叫做狂熱份子：群眾運動聖經The True Believer: Thoughts on the Nature of Mass Movements。呢本書嘅作者本來已經失明，後來睇返嘢之後繼續做碼頭工人，透過觀察同埋不斷自己思考，寫咗唔少經典著作，被後世譽為碼頭工人哲學家。呢本經典點解咁重要呢，差唔多所有讀政治行政系嘅同學仔都會接觸過，佢係從參與社會運動嘅參加者角度深入剖析，好坦白咁講出越係激烈激進嘅社會行動，參加者都係喺當時社會嘅失敗者，佢哋嘅不滿同埋對前途嘅絕望，好容易就比一啲好簡單嘅訴求點燃起嚟，簡單嚟講其實都唔係好知道自己做緊乜。
咁英國係咪真係有好多失敗者呢？老外朋友就同我講好傷心見到英國嘅騷亂，但係個政府真係幫唔落手，因為由市政府到聯邦政府都財赤，日日講住嘅唔係削減公務員職位就係要喺未來加稅加收費。啱啱上台嘅工黨就埋怨上一屆政府大花筒，連一向比較親近基層嘅工黨都話要增加市政稅，呢啲都係人人要交嘅稅。
咁但係同時英國政府又對啲難民好爽手，租咗全國四百幾間酒店比源源不絕嘅難民居住，咁又點唔會激起啲群眾憤怒呢？其實保守黨執政嘅時候唔係冇提出過解決方法，就係貼錢送晒啲難民去盧旺達，但係當時在野嘅工黨就強烈反對，最終到而家都搞唔成。但係今日工黨上台又係所謂民意授權，咁呢啲死局係咪真係透過選票可以解決呢？
老外仲話今次騷亂有好多參加者係年青人，佢哋唔單止唔再想讀大學，因為讀完大學都搵唔到咩好工作，又要孭住一大筆學費債務，所以對人生前景毫無希望。除咗年青人失業率，佢哋連喺當地安居娶老婆都有困難，話係針對乜嘢種族主義同埋難民其實都只係藥引。
不過要讚英國政府唔使幾日就拉咗幾個示威者，仲用神奇光速審訊同判刑，首相施紀賢話呢啲咁快嘅決定可以震懾暴力行為。唔知點解差唔多嘅景況喺香港又會有人話係法治之死，而家仲排緊期嘅社會事件案件仲係多不勝數。
老外鍾意食西餐，去咗海港城食出名嘅咸火腿，仲有分出唔同月份嘅口味，夠晒細心，行過商場睇落人流多番啲，咁樣同九倉及太古地產業績講嘅情況都有啲相似，個市唔係真係差成咁。祝福香港，祝福英國。
曹參國
註：專欄作家言論不代表本網立場
