老友近日前就喺尖東Icon薈唯港設宴兼同佢嘅校友組織搞就職禮，曹老闆當然要捧場啦。點知見到幾個地產界老友，講到近日幾單地產消息，個個樣都灰晒，個後市幾差可想而知。
近排最令老友震驚消息當然係地產界龍頭新地突然宣佈，旗下掃管笏住宅項目要暫時停工，官宣就話住宅項目因應市場變化作出設計改動，地盤進度及工序將有所調整。但實際原因點就眾說紛紜，點都顯示對現時地產市道唔多睇好。
另一單係政府推出嘅私人興建資助出售房屋「樂建居」柴灣項目反應相當麻麻，只收到一份標書出價，最終因未達底價而要流標收場。政府項目都無咩人願意投，反映政府都未太摸清地產商。
仲有香港建造業總工會日前話，本港多個地盤近日接連發生欠薪事件，已接獲逾500名工友求助，涉款仲超過3,000萬元，工會仲擔心欠薪事件陸續有嚟。
老友好憂心咁話，連串不利消息反映咗本港住宅供求出現問題，加上香港嘅建築成本甚至比日本東京更高，位居亞洲第一位，若然賣樓賺唔到錢，個個發展商跟住新地嘅做法，對本港樓市、經濟、以及社會嘅損害咪話唔大。曹老闆都認同，雖然新地話會將安排受影響員工調職至其他項目，但係建築業亦會因而受影響，工程項目減少，建築公司可能會裁員，基層工人失業自然會衍生更多社會問題。
至於點應對呢個問題呢? 曹老闆就嘗試發表淺見，認為香港的成功有賴一直奉行自由市場經濟，未來亦應由市場供求自行調節，由市場主導。面對經濟不景，政府需因時制宜，因應各行業嘅運作拆牆鬆綁，好似以樂建居為例，業內人士指樂建居限制多，如果政府唔點改變賣地條款，睇怕未來只會再流標，最終影響住宅單位嘅供應。小弟淺見，一眾老友都話認同喎。
其實地產市道同政府庫房收入有模大關係，依家香港面對近千億財赤，政府上下各部門應用盡所有方法解決，諗下點開源節流，同埋點樣優化政策，令社會興旺啲，咁先幫到地產業界，唔應該每一個部門各自為政嘅情況繼續出現，咁樣點會有效率呢?
至於當晚食物方面，首推蠔皇原隻鮮湯鮑伴花菇，相當有咬口，另外百花石榴球伴彩虹碧綠玉帶，玲珠南瓜露等亦值得推介，絕對可以一試。
曹參國
註：專欄作家言論不代表本網立場
