前幾日見到報道話美利樓啲餐廳寧願賠租都要提早走，即係賠租都蝕少過開住舖等運到蝕燈油火蠟人工。赤柱無人都唔係呢排，自從防疫趕走大量外資後，赤柱真係少咗好多西人，而且嗰度又唔係咁方便，啲舖頭來來去去都係嗰啲，周末香港人又熱衷上深圳，赤柱都真係難搞。
見有人sell橋，建議將美利樓深圳化，改引入一大堆大陸食肆品牌吸引內地遊客，首先文中有寫大陸客都變深度遊，再幾日前先有新聞講有大陸客瞓街唔住酒店，而家喺人仔弱嘅情況，建議佢哋嚟香港食大陸都有，但定價更高嘅食肆？好似講唔通。文章又建議引入歌舞同民族表演，用新疆歌舞做例子，睇民族表演點解遊客唔直接去新疆？
將美利樓「深圳化」最大問題係，大大個深圳就喺側邊，人哋大陸客唔使出境，用同一種貨幣，同一堆app，旅遊景點有更好硬件配套。夾硬將自己翻版成A貨甚至B貨深圳，咁樣唔係競爭係自掘墳墓。
情況就好似香港近30年，好多人見邊個城市好就話學，邊樣嘢in就話做，但越嚟越迷失自己定位，就係保住國際金融中心地位，因為呢個始終係香港獨特優勢，承擔大陸同外國資金進出同人民幣國際化任務，亦係大陸唯一一個有呢個能力嘅城市。
就算要做旅遊，都係要建立自己嘅特色，凸顯自己歷史文化，睇返Euromonitor International公布百大旅遊城市，頭20名都係形象鮮明嘅城市，香港排17，都有厚重歷史。何況深圳係發展科企為主，大陸人去嗰邊為打工多，一到假期就返鄉下，大陸人去旅遊都頭10位甚至20位都未必數到深圳，將香港景點深圳化吸引大陸客？講笑咩。
金缸經
註：專欄作家言論不代表本網立場
