傳統上暑假檔期大把好戲上映，近期消委會都嚟搶戲，發布最新一期《選擇》月刊，涵蓋30款樽裝水在消毒劑殘餘及副產品測試結果，當中包括在港上市公司農夫山泉 (9633) ，及百歲山出產嘅樽裝水產品，兩者都檢驗出每公升3微克溴酸鹽。相關含量已達歐盟訂定適用於經臭氧處理嘅天然礦泉水，以及泉水嘅溴酸鹽最大限值。消委會表示，攝取大量溴酸鹽可引致噁心、腹痛、嘔吐、腹瀉，嚴重情況甚或會影響腎臟及神經系統。
參考農夫山泉2023年年報資料，收入約427億元人民幣，水類產品為主要收入來源，約203億元，佔比高逾47%，所以農夫山泉向消委會發律師信指其檢測報告作不客觀評價，要求道歉及澄清，大家都明嘅。假若其他飲品公司如「嘉X伯」、「生X啤」或「維X奶」等，佢哋歷史悠久同時係主要收入來源，產品被評有成分超出國際標準，攝取大量對人體有害，佢哋唔通咩都唔做咩？
今次事件除咗港人，亦引起內地網民熱談，其中有指農夫山泉一直在打「山泉」擦邊球，言下之意有別於市面上兩大主流飲用水產品「天然礦泉水」和「純淨水」，百歲山及農夫山泉的定位是「飲用天然水」。然而，我們會否錯放焦點，其實問題不在產品定位本身，應聚焦於溴酸鹽含量。當水進行消毒時，用作消毒嘅臭氧同水中天然存在嘅溴化物產生反應，便形成溴酸鹽。以世衞標準，飲用水溴酸鹽含量上限訂為每公升10微克，而百歲山及農夫山泉只錄得每公升3微克。
3微克對比10微克，明顯遠低於世衞標準，所以消委會對百歲山及農夫山泉原本結論值得相榷，如今更新對兩項商品嘅結論，還上市公司農夫山泉一個公道係其次，更重要是此舉能讓公眾認清實況，放心飲用，絕對係消委會作為法定機構對公眾必須肩負嘅責任。風波至此雖暫告一段落，但值得反思個人心態，當相同事情發生在內地企業與港企，如果我哋評價截然不同，咁到底係企業有問題、消委會有問題，定係我哋有問題呢？
金缸經
註：專欄作家言論不代表本網立場
