本港上周公佈最新失業率，按移動3個月期間統計，今年5至7月接近11.8萬人失業，失業率為3.1%。其中建造業超過1.6萬人，佔總失業人數近14%，失業率為4.3% （高於前值4.2%），高於整體嘅3.1%。若單睇建造業嘅「樓房裝飾、修葺及保養」，失業率更高達5.5%，亦係30個細分行業類別中最高，間接反映從事建造業人士失業及就業不足問題嚴重。
更核心問題明顯係樓價已經歷一段長時間調整期，並於可見未來睇唔到改善迹象。當然美國9月進入減息期值得憧憬，但暫時利率期貨顯示減息1/4和1/2厘機率分別是75%和25%，面對緩慢減息進程，政府係咪齋等就等到樓市復甦曙光先？而且得人驚嘅係大家都知會減息，但樓市無人炒減息！樓市不振經已令民生帶來影響，6月曾有外媒指建造業成失業「重災區」在於輸入外勞，工資被大幅壓低令勞工短缺。
政府反駁與事實不符，表示今年3至5月數字與去年同期一樣，言下之意係咪毋須考慮點改善建造業失業同就業不足問題？然而，有港媒報道近日本港多項工程出現拖糧問題，建築工程業界陷入苦況，更接獲投訴，指正進行病房翻新工程嘅大口環根德公爵夫人兒童醫院，因主承辦商與二判之間有拖糧情況，影響到醫管局工程，曾有工人拆門抗議。另有建築師業界指，很多建築師事務所經營有困難，有事務所更是九折出糧、亦有部份要裁員。
建築師事務所商會主席劉榮廣於8月14日已去信發展局長甯漢豪，表示業界部份經營者已處於「掙扎求存臨界點」，促政府推出措施協助業界渡過難關。現時不但對建造業勞工、建築師，甚至是整個地產行業都是「存亡之秋」，嚴峻程度相信外人都見到整個地產行業難處，業界經已無法再等，3月撤辣一度為樓市帶來啲啲希望，既然呢劑特效藥藥力早已消失，政府係時候再嚟一劑特效藥，必須推出措施進一步鼓勵首置，同時對於換樓購買力，也應銳意考慮怎樣釋放。
金缸經
註：專欄作家言論不代表本網立場
