「何氏伉儷」劇目死唔斷戲，不過另一劇目「垃圾徵費」有啲搶戲。港府原定徵費實施日期為2024年4月1日，之後宣布推遲至8月1日，於5月27日政府向公眾宣布移除8月1日的實施日期限，亦未提供措施下個生效日期。相信係當局收集大量民意後作出決定，唔少市民樂見此結果。然而，亦有聲音表示「垃圾徵費」實施不應一拖再拖，有報道指已有5個環保團體和關注組織去信特首李家超表態，認為政府需要把握8月1日的機會穩步推進。
呢啲團體包括思匯政策研究所、綠色力量、綠色和平、綠惜地球和綠領行動，筆者留意5個團體經費來源或來源之一是靠公眾捐款，想必有大量來自在港居民經費，值得思考到底這些團體就「垃圾徵費」一事，有無瞭解捐款者主流意向呢？環保當然對香港甚至地球生態有益，問題係「垃圾徵費」對香港環保推動有多大成效？「垃圾徵費」可以追溯至2013年政府發表《香港資源循環藍圖》提出，當時環境局副局長陸恭蕙，接受傳媒訪問時表示當時藍圖唔係一、兩個人意見，而是全政府意願。
根據網上資料，陸恭蕙於2000年成立思匯政策研究所，亦曾經係該組識行政總監 (2000至2012年)，而現於思匯政策研究所官方網站，則未有顯示陸恭蕙參與任何職務。畢竟陸恭蕙係創辦人，所以該組識支持「垃圾徵費」政策可以理解。筆者在官網查閱思匯政策研究所關於廢物管理內容，主要是環繞建議政府應該做乜，應該做物。不過既然組織創辦人係前政府高官，係咪可以喺香港垃圾分類及/或回收行動上，參與更多呢？行動唔係比齋提供建議對推動香港環保更實際咩？
上述五個團體，相信大家不時喺街上見到佢哋呼籲募捐，既然不約而同表示對香港環保發展有意見，若團結參與香港垃圾分類及/或回收職能，係咪更能令捐款的在港居民更心悅誠服呢？
金缸經
註：專欄作家言論不代表本網立場
