近排個個都金睛火眼睇住香港代表隊喺法國巴黎奧運嘅比賽，當中最矚目之一就係香港嘅兩面金牌 －－分別係女劍神江旻憓喺女子重劍個人賽決賽反勝奪得金牌；另一位係香港劍神港隊劍手張家朗喺劍擊男子個人花劍比賽中成功衛冕，為港隊奪得今屆奧運第二面金牌。
要數最精彩嘅地方，就係兩位都係去到決一劍嘅時刻先至可以分出勝負，而且兩位劍神都係喺落後嘅情況之下追番上嚟反敗為勝。女劍神江旻憓曾經試過兩次膝頭韌帶撕裂，要做手術，甚至到比賽前一個月，連進攻都成問題，決賽當日喺面對1比7既大落後情況，現場對手又有好多法國嘅粉絲支持，盡佔主場之利，最後憑住香港人打不死嘅精神，反勝奪金！另一劍神張家朗同樣面對住決一劍既勝負關鍵時刻，裁判兩度判決得分無效，但劍神表現非常冷靜克制，事後訪問當中佢有講到，唔好糾結喺嗰一劍有效定無效，最重要係集中專注下一劍點樣打，可見心理質素强到搵唔到陰影面積，最終反敗為勝！
現今香港嘅經濟情況，的確唔能夠講好容易，但我哋香港由惜日漁港到成為一個國際大都會，當中亦經歷過無數嘅困難，靠嘅就係嗰一份打不死精神，最終每次都可以反敗為勝！逆境波從來都唔會難到我地香港人！今屆奧運香港成為劍擊之都，依一劍刺中每個香港人既心，劍擊如是，前景亦一樣，憑住每個香港人打從心底入邊DNA嗰份獅子山精神，香港最終必定可以反敗為勝！繼續喺國際舞台發光發亮！
金缸經
註：專欄作家言論不代表本網立場
