HKTVmall母企香港科技探索（1137）昨日（30日）公佈2021全年業績，雖然集團連續錄得第二年盈利，但就少賺92%。行政總裁王維基在線上記者會主力介紹英國的新計劃「全自動零售商店」，而在講到如何在云云競爭對手中，保持集團的龍頭地位，他就大爆金句。香港科技探索績後一度跌超8%，現報6.9元。
講競爭對手
「呢個行業講兩個流，一個人流，一個物流。呢三個月證明，人流唔係一個問題，疫情之下大家好樂於網購。」
「如果呢段時間大家有幫襯超市網購或者其他網購，你會發覺佢哋係take唔到張order，因為物流基建未做好，呢個係最主要決定性因素。」
「喺香港，大家以為好多公司做緊物流，其實好多做緊B2B，真係做緊B2C，對顧客嘅物流公司唔多。呢個都係點解我哋好相信可以繼續保持香港網購市場嘅領導地位。」
講新計劃「無人商店」
「就我自己親身見到，英國而家所謂無人商店用更加多人力，要員工將貨品排列整齊，又需要好多保安，我覺得只係提供客人自出自入方便，並冇任何成本上嘅節省。」
「自動商店最大競爭優勢，在於完全唔使前線員工運作。喺香港做零售業，最大開支係店舖租金，自動系統係幫唔到呢樣嘢，只係幫到減低人工成本，暫時無計劃喺香港推出。」
講遠景
「我哋扎根香港，甚至叫做喺香港跑出，全靠我哋用咗好多科技上嘅運用。比起我哋嘅對手，點解我哋能夠脫穎而出，最主要我哋用咗好多科技，亦想藉呢啲經驗投資喺其他國家。」
「目標未來3至5年，每年做到120億元至150億元營業額。」
