交齊文件，最快可以兩個鐘審理，結果：唔批。
金管局可以善意提醒銀行，但唔可以迫銀行係規避風險的大原則下漠視風險，喺估值不足或者貸款行業屬於高風險行業下批出貸款。所以，金管局可以做的，已經做足，透過行政安排建議銀行兩周內審理貸款，但唔代表可以迫到銀行放貸。
至少小弟覺得，香港政府仲未做到可以透過召開乜乜記者會，就迫到三大發鈔銀行漠視風險去狂批貸款。
又，如果政府又或者類似央行角色的監管機構可以迫到銀行放貸，內地人民幣新增貸款就唔會連續幾個月差過市場預期，日本經濟就唔陷入流動性陷阱，再多的錢都落唔到入實體經濟。
政府係咪咩都做唔到？唔係既。
好似早埋公開啜泣的行會成員兼經民聯副主席林健鋒咁，建議政府再次推出「百分百擔保特惠貸款」就可以，即係政府包底下銀行自然樂於放貸，因為可以將風險外判，又或者由信貸評級AA以上的政府揹飛，何樂而不為。
不過又咁，小弟提醒林健鋒呀林生，政府係疫情時即係2020年4月推出「百分百擔保特惠貸款」，截至今年7月底止，涉及批出的貸款有66,980宗，涉及款額成1,432億元咁多，借得錢多唔係重點，重點係有關貸款計劃的壞帳率高達9.2%，超過6,100宗貸款，或者132億元貸款，呢筆數，係由政府揹。麻煩呀林生計計，要抄多幾多張違泊先可以冚到132億。
JL 李鴻彥
https://www.facebook.com/LeeHungYinJoe
註：專欄作家言論不代表本網立場
