近期再中Covid的Elon Musk動作多多，講完要搞social media，跟手Tesla宣佈將於未來股東大會就拆股投票。TSLA股票反應就食過返尋味，盤前升定5%。
而最新三大指數期貨悉數由跌轉升，延續美股近期升勢。最近氣氛之好，幾乎令人忘記早前向淡的理由。
納指最近兩星期分別升8%及2%，背後理由解釋起上嚟都幾牽強，畢竟由通脹、債息到經濟衰退隱憂都只有加劇而無減退，偏偏大市就係該跌唔跌。
先睇商品，油價因為中國上海封城，需求減而跌4%，紐油見109美元，布油報113美元。但整體彭博商品指數ETF仍然大漲小回，DJP距離個頂不過約5%，亦即可以預期通脹只會有增無減。
而10年期債息則高見2.5厘，但對息口敏感的增長型科技股影響唔算大，SNOW及NET等都喺上周五尾市脫離低位收市。
而更令人擔心係孳息曲線勢將全面倒掛﹐其中一段10年期債同2年期債息差只有14點子。一般嚟講，長債息應該要高過短債以彌補承受較長的風險，一旦倒掛即預視未來經濟會衰退。之不過，個預期可能係講緊2至3年後嘅事。
3件事夾埋一齊發生，個市都唔肯跌，有解釋係資金回歸Big Tech安全港，因為買債會跌，買金對沖唔到通脹，只有部份有加價能力嘅股票係無選擇下嘅選擇。
部份個股消息︰
Sea(SE)據報結束印度電商業務，旗下的Shopee發佈聲明指有有鑑於全球市場的不確定性，將關閉在印度的業務，退出當地市場。
Sea於2021年10月開拓印度市場，半年時間內先後遇到印度當局禁旗下遊戲程式，同時又被大股東騰訊減持。
本周值得留意數據︰
周三︰ADP小非農數據 GDP 原油庫存
周五︰非農數據 失業率 PMI
