自議息後，睇三大指數方向都係反反覆覆，偏向下調整。睇埋板塊表現就見唔到方向，例如金融板塊照計受惠加息，亦都係跌。而指數未能反映嘅係，增長股開始跌定，所以看似大跌市，但整體調整相對溫和。
綜合市場意見搵原因，成交減少放大波幅，亦反映假期前夕主流觀望態度。另外就係例牌嘅新型病毒，以及任你演譯嘅加息反映晒未？
個股方面︰美光科技(MU)業績及前景雙雙好過預期，財年第一季收入76.9億，按年升33％，稍勝公司指引76.5億﹔經調整每股盈利$2.16，預期為$2.1。
預測財年第2季，收入75億，經調整每股盈利$1.95，勝過分析預期的72.7億及$1.86。
MU最新升8％至88.6美元，不過年內19％回報，仍然落後於半導體同業的33%升幅﹔最新瑞信睇$130、高盛睇$101、美銀睇$100。
操作方面︰
最近大波幅上落市，睇法隨時今日錯聽日啱，倉位管理嘅目標傾向避開難度，但仍要適時入場。本欄目由12月1日開始叫忍手直到FOMC後，避開增長股跌浪，現階段開始冒險入場收集股票。係咪等於睇法係大市見底？答案係唔知，所以以3成倉位去博見底，即使大波幅相對頂得住。
最好情境︰增長股開始見底，部份軟件股開始企穩，例如數據概念相關的MDB SNOW，適合慢慢加上去。
中性情境︰一直睇住的納指市寬持續低迷，得25%個股喺200天線樓上，究竟會Big Tech會企硬頂住指數，定係開始追跌，暫時未講得埋。
最差情境︰大型指數股轉弱，參考今年2至3月加息預期引發嘅跌市，Big Tech隨時要由高位回15-20％，連同增長股都會橫行向下。
倉位︰
手上主要有NVDA，上周五$285唔係靚價入，即刻俾人話又燈，咁今日咪好地地﹔加少量QCOM CRWD SE ABNB試，整體倉位水平唔過3成。
