標指期貨向今年第70次創新高，回頭一望聖誕快車已經靜靜開出，無貨喺手都幾頭痕。撲朔迷離嘅今輪升市成交低，市寬一般，而升勢集中度高，定或者係投資者就係需要接受牛熊並存係常態。
先講聖誕快車呢個季節性因素，往績顯示每年最後5個交易日至下年首2個交易日，大概有79％機會見到架鹿車飛過，標指平均會錄得1.33%回報，資料來源為LPL Research。
不過話今次升浪令人難以安心嘅包括，標指明明創緊新高，但仲有3成股股喺200天線樓下。而且一反常態係創新高嘅日子，成交相當淡靜，包括有揸嘅NVDA，連日反彈嘅成交都低於10天平均。
JPMorgan就話投資者睇得太淡，市場諗得聯儲局太鷹，對高估新病毒影響，認為升幅集中係要留神，但唔能夠作為判斷股災先兆。而且投資新常態係認為巨企mega-cap係避險工具，作用類似似債券。所以大股唔會災難式下跌，而中小型股small-cap災後會吸引到人執平貨。
今日個股焦點︰Tesla
Wedbush分析師Dan Ives繼續唱好TSLA，睇明年升到1400美元，基於中國強勁需求及位於德州及德國柏林新工廠開啟。Dan Ives預期Tesla到2022年底的產量將由今年近100萬架，倍增至200萬，當中4成出貨會去中國市場。
