隔晚聯儲局公佈議息結果加息0.25厘，提高通脹預期，縮減9萬億資產負債表留一手，三件事都無乜意外。不過當GDP增長預期以及加息進程出人意表地放鷹時，股市先跌後竟然大升。
大市反彈時間點就係鮑威爾見記者時，再三講到見唔到經濟衰退跡象，覺得美國經濟夠強，可以面對緊縮政策。同時幾強烈地反對聯儲局太慢嘅論調，經濟放緩先開始加息？滯脹？衰退？鮑威爾透個記者會最少短時間內令到個市場放下戒心。
但睇唔透嘅又唔止係我哋普通小散戶，基本上由大行、基金經理調查、市場共識都無預期2022年會大幅加息。而估到加息預期大增，仲要預料到股市因此上升就難上加難。個人諗法不妨留一線，睇睇納指能否突破下降軌，重新畀位人入場。
至於講到目前市場仍然有的機會，可能就係跟住油價回落的油股。特別係有股神畢菲特加持的西方石油(OXY)，最新獲巴郡(BRK.B)月內3度加注，3注共值56億美元。總持股增加到去1.36億股，或接近OXY的15%流通股。
講到尾就係炒股神功課，中間睇嘅資訊都係為興趣，以及解釋緊點解各大行及能源機構都睇下半年油價會嫣。片入面講講EIA 高盛點評估對俄油被制裁的影響，特別係中國可唔可以接到俄油？又有無著數呢？
