每當跌市就會有股災預言家嘅報道，可能會望一望翻譯，然後哦一聲。但同時又會好奇，年年都話爆煲究竟點生存？襯住個市日日跌，睇吓究竟淡友講咗乜係自己miss咗呢。
其中一位相當有份量嘅泡沫/股災預言家︰Jeremy Grantham，GMO資產管理創辦人，上年1月警告咗一次話Waiting for the Last Dance，今年再講Let the Wild Rumpus Begin，預告房屋、股市及商品一齊爆煲。
哦一聲之前，Jeremy Grantham篇文嘅附錄就提到GMO資產管理成功避開1989日本失落30年﹔1999年科網爆破前減倉轉去Value﹔2007年金融海嘯減倉轉去揀Quality(大致係賺錢能力高公司)。背後理念係均值回歸(mean reversion)，以避開股災角度係幾成功。
而今次Jeremy Grantham嘅GMO因應世紀股災來臨嘅做法係會減股票﹔轉去日本價值型股價等非美國股票﹔Long低PE(平均9.3x)價值型股，同時Short高PE(平均48.5x)增長股*。同時會拎住啲金銀及現金，等機會入市。
拍埋一齊睇Jeremy Grantham嘅警告今次超級泡沫，標普500指數會至2500點，拍得住大蕭條、科網及1989年日本。形容緊今次股災3個徵兆已經出現，1.)自2020年開始嘅升幅過急，速度超越一般牛市﹔2.)市寬收窄到大藍籌先企得穩，因為基金經理因商業原因泊錢去安全股票，所以當Big Tech都跌就會大冧﹔3.)市場唔理性地炒meme股、EV、Crypto及NFT。
而預咗會俾人駁嘅佢，引述後生時炒期1968年至69年，買隻American Raceways嘅股票，渡個價返嚟由7蚊升到21蚊，然後升到年底聖誕嘅100蚊。賬面曾經贏到一筆商學院7倍學費，如果今日個物價計就可能係過百萬美金，最終就喺第2年6月送返晒出去。當年都俾old seafood們警告過，話今日到自己講預咗無人聽咁話。
睇到嚟呢到會覺得個講法係情理兼備，可能唔止係哦一聲就算。但個成本往往就係會避開埋大升市，甚至更準確去講呢套原則參與股市﹐目標根本唔係贏得多，而係贏通賬就收手。
而早在2020年警告大家嘅Jeremy Grantham，GMO旗艦基金之一︰Benchmark Free Allocation，2020年回報-2.44%又有幾多人接受到？
結論係頂住唔好畀自己亂晒龍，美股牛市遠比熊市長。即使有本事預測泡沫爆煲，對贏錢幫助亦都唔大。
