美股於最近兩個重要數據公佈後，初步反應其實係相當硬淨，包括2月4日公佈新增非農業職位46.7萬，當日係升市﹔而隔晚1月份通脹見7.5%，早段試過轉燈向上。
從早段反應去睇，預期3月加息，對市場而言已經唔夠阻嚇力。繼而就有聯儲局另一位投票官員Bullard出口術，預告7月前加息要加夠1整個百分點，先可以推得冧納指跌2.1%。
究竟Bullard講法有幾鷹？睇聯儲局開會時間表，距離7月仲有3次會議，分別為3月、5月及6月，即係3次會議加4口息。Bullard最新加息言論，推翻早前有官員話唔使加2口息講法。同時令市場預期提高，從CME Fedwatch工具睇，加息2次，即係加50點子的機會由1周前的33%，升到最新的93％。
再睇埋6月份會議預期，加息1整個百分點或以上的機會率升到96.9%，反映緊市場快速消化緊官員放風。
股市幾時先適應加息？
以上新講法令反彈市劇本稍稍改變，假設就業上周五數據爆數，唔加2口息就當勝預期，所以納指開始見到底，增長股更加係反彈。
同樣係假設，按此邏輯推論，今次通脹爆上到7.5%，3月都只係加兩口，相對辣度唔算高。但最大問題係中間嘅波幅太大，以及間中有一兩位官員口水式加辣，就足以令好淡雙方都輸。
結論係仍然睇緊市場幾時適應加息，未來加息對股市的阻嚇力會漸漸下降。
Software股都可以迎合市場口味?
風頭火勢就自然係科技股，隔晚提到兩隻爆數SAAS軟件股Twilio及Datadog，股價走勢有頗大分別，估值較平嘅TWLO績後升幅幾乎蒸發，而貴價DDOG就相當硬淨，從中可以探聽吓市場口味。
市場預期TWLO及DDOG於2022年可以增長35%及50％﹔相應市銷率為TWLO係10倍，DDOG係35倍。但當中分別就係DDOG開始見到有盈利，雖然係少到無實際意義的PE，Q4經調整每股盈利為$0.2，但似乎係市場都會考慮的項目。
再睇早前的NET、BILL及TEAM等，要不是蝕錢收窄就係有錢賺，而只得增長嘅TWLO或CFLT相對差啲。
