華爾街戰線｜一年後再睇第一隻倍倉股：富途FUTU

好多故仔要講嘅富途(FUTU)終於出Q4業績，切入角度都係問緊12倍PE係咪消化晒所有壞消息？中概股入面睇得最多係佢，因為exactly喺上年同期炒佢贏到變倍倉股，1年前再返轉頭睇，前後比較大約係咁︰

全年收入︰$4.3億 變 $9.1億

攤薄後每股盈利︰$1.3 變 $2.36

有資產客戶︰51.7萬變 124萬

• 新客搵成點？轉攻星洲、美國

Q4業績特別值得睇係，可以反映到11月個監管新聞有幾大影響。臨出業績前跟大隊落完之後反而舒服咗，股價高位預期同低位預期分別係，Q4有監管之下仲有新客源，算係FUTU贏啦。

再翻睇埋Q3，當時季內新增有資產客戶16.6萬，有6成來自大中華地區，4成係新加坡同美國。去到Q4，富途新上客雖然得7.7萬，但個安全系數高咗，業績寫組成部份9成來自香港、新加坡同美國。

字面上已經反映，香港、新加坡同美國，先係富途未來想集中嘅市場。理想還理想，咁仲有冇市場先？

先講香港，以今年20至64歲人口483萬人計，空間仍然有，不過要時間。好似一通執笠咁，大家都見當晚已唔少人喺連登FB話要過檔FUTU開戶，而甚少聽人講話去IB的話，大約都反映緊散戶心目中係鐘意隻牛多啲。

睇埋國際市場，開多條線去新加坡同美國市場， 似乎就搵到啲進展。以新加坡為例，註冊用戶數佔新加坡 20 歲以上成年人口的 10%，Q4收入按年計仲倍增，代價係marketing成本都倍增，始終券商吸新客的formula避免唔到開戶要送錢，最終就睇keep得住班客的話，要賺返就唔難，你睇吓自己個月結單就知。

• 監管影響點睇

至於問題核心嘅監管問題，棘手地方係無人知會點。想知客人信心嘅，可以睇資產淨值，即係放喺富途戶口嘅錢有幾多︰Q3有4239億港紙，Q4有4078億港紙。中間少咗161億或者按季跌3.8%，主要係反映緊同期恒指跌4.5%。

意思係不幸地你個市場有一大部份係港股，美股標指上季升1成，IBKR客人資產淨值期內多1成，Robinhood先多得4%係幾fail，比較之下FUTU無跌得多過恒指算係咁，同時佢哋自己都承認係有資金流出，視乎同咩比較。

• 估值比較

話說記得2020年底第1次買FUTU，一堆「契媽股」仲講緊市銷率﹐或者連收入都無嘅「市夢率」時，2020年FUTU係出奇地抵買，當時單計前3季盈利都有$0.81，PE唔使50倍，仲有倍倍聲增長。

又落到去現價睇過去12個月盈利計PE，大概係trade一個成熟市場嘅價，值唔值就大家自己判斷。

長篇大輪完結論係，經歷尋晚血洗中概股，估值殘到不行。FUTU個反應係上次3億回購做完之後啦，再出5億做回購，以現價市值41億嚟講，都幾誇張吓。

下一步我會睇住，正如上季FUTU管理層嘅講法，即係好想有監管。個邏輯就似係Bitcoin咁，有監管就代表納入主流，變相有合法地位，所以你見拜登話研究加密貨幣時，Bitcoin係即刻有反應。