台積電(TSM)經歷咗令人失望嘅大半年，年內仍然正數回報，幾乎全靠呢幾日。但睇半導體板塊入面龍頭股之中，淨係揸TSM可以話喊出嚟，尤其係當你比較NVDA、ASML、AMAT的話。
不過隨住台積電默認加價，據台媒報道，先進製程晶片加10％，成熟製程晶片加20％，下半年股價轉勢在望。因為影響股價嘅關鍵－毛利率，有望改善。講點好轉之前首先要提前因，TSM上半年差係因為一邊要擴展長遠產能，另一邊應付短線急增需求，連同貨幣因素(台幣升值不利出口)為TSM帶來壓力。上季毛利率壓縮至僅僅50.04%，業績指引下限。但隨住下半年加價、台幣升勢降溫、5nm 製程晶片漸入佳景，將會帶動台積電股價轉強。有分析預期單計加價因素或能提高來季毛利率1個百分點，大有機會到業績指引上限的51.5%。翻睇紀錄，2019年Q1毛利率見底41％，之後一直越做越賺錢，去到高峰2020年Q4嘅54％，其暗股價由41元三級跳去到120元水平。部署策略，保守唔怕錯過的話，108元水平過去幾次都有支持。正如我自己亦一直長期掛定$110元盤等hit中。較進取的話，118元水平，望上去望落去都有10蚊，risk reward比例1:1，夠唔夠就要自行判斷，穿108元就點都斬。
