開門見山，Lululemon(LULU)係間有趣嘅好公司，但現價無貨、唔追、但會觀察。
幾乎每個街口都會見到有女著嘅Lululemon上星期出業績，利伸無買過呢隻股票、無著過佢產品、績後都無追，純粹出於好奇想睇佢特別之處，順便整合埋業績數據留個紀錄，希望幫到大家又幫到自己。
自疫情低位上升2倍嘅Lululemon，績後再創新高，截至上星期五，市值達550億美金，進一步追貼Nike(2,600億)及Adidas(600億)。
重注中國市場 上海設總部
績後股價咁行法，條數當然勝預期。2019年公司掟咗個五年大計，其中一個目標係2023年收入要翻倍，點知管理層最新話今年內就可以到數，足足提前兩年。
另一個指標係要五年內國際收入升兩倍，咁歐美以外增長動力都唔洗問，又係大中華。上季11間新舗，7間喺亞太區，嚟緊仲會喺上海整個新總部；另外，Lululemon喺2015年先進入香港市場，依家都已經擴充到7間分店，黎緊第8間就應該落戶中環H Queen’s。
每條瑜珈褲袋毛利近六成
比較Nike、Adidas及Lululemon，毛利率最高係LULU，第二季近58％。換句說話係當你用1,000蚊港紙買條瑜珈褲，LULU落袋有581蚊，得419蚊會去咗啲料到，同樣計法Nike及Adidas落袋大約460蚊及520蚊。
但唔係話LULU用料重本，成本咁低？咁係因為用家好滿意，滿意到Lululemon根本唔需要減價，所以個邏輯係賣得貴，所以用料嘅成本佔收入唔高。
直接銷售比重贏晒Nike、Addias
一向以口碑取勝嘅Lululemon，唔洗靠批發商，零售店基本上都係直營，計埋網上直接銷售，按比例睇拋離Nike同Adidas。
以呢個角度去理解Lululemon品牌效應，死忠fans會自動波上網買，中間慳返唔少sales，聽講舖頭員工係叫做educator，個個都健康人生咁嘅款，即係正面版A&F？
不過廣告成本(無拆開嚟講)都係唔平，所以最後淨利潤三間差唔多，都係一成鬆啲。
P/E貴得有道理 但睇定啲先
曾經Under Armour(UAA)有過剎那間嘅希望搶贏Nike，不過最後都淪落到去咗Outlet減價區，股價亦都一樣大減價，雖然升返唔少，但較高位做緊半價。
返嚟Lululemon賣咁貴都仍然keep得住fans，最新67倍PE估值貴得有道理，增長亦保持強勁，解釋緊LULU比Nike 45倍PE多一半的理由。
但係依家個市咁樣就唔太想高追隻成長股，況且越南係LULU主要生產地之一，果邊疫情相當窄使，加埋航運一時三刻都無轉機，不如睇定啲，希望有特價時段啦。
——————
密切留意BossMind動向！立即CLS
