港股恒指近期出現星期五效應，逢星期五必升。不過，除咗星期五之外，9月至今恒指只得一日升超過100點，升跌比例係4:15，即係話星期一至四嘅恒指係地獄般嘅存在。
港股衰到一個程度，要成立一個促進股市流動性小組，例如打風繼續開市、減印花稅之類有可能增加交投嘅方法，總之救得就救。救，可能幫到件事，但不會足以令事情由跌轉升。如果港股投資者一直以來將目光局限喺港股同埋恒生指數嘅話，就會不斷沉醉喺「跌得多就會升」、「有熊市就會有牛市」嘅謎思當中。如果放眼全球嘅話，就會發現，其實有好多好好哋、生勾勾嘅經濟體系，可能因為各自嘅原因，令佢哋嘅主要股市指數多年來進入不升漩渦之中，升跌周期似乎已經不存在。
兩個例子，一個係韓國KOSPI指數，情況比恒指好一點，目前2408點同2017年7月相若，但相對2007年11月嘅16年前，只係升咗兩成。另一個係大家經常吹奏嘅新加坡，海峽時報指數報3174點，同樣係2007年嘅水平，海峽時報指數失去升跌周期嘅趨勢更明顯，但竟然都比港股好一點，總能說一句，「港股，you are not alone」。
原因唔係呢篇文章要深究嘅事情，因為太過複雜，小弟亦不可能連新加坡、韓國股市都熟悉。三個股市亦有另一個簡單共通點，就係估值低迷到市賬率1倍嘅超低水平（恒指：0.87倍；韓國KOSPI：0.89倍；新加坡海峽時報指數：1.08倍）。市賬率1倍代表乜嘢，就係你可以用1蚊去買入公司嘅1蚊資產，如果低過1倍，代表個股市價值連資產價值都不如，簡單啲講，上市公司缺乏內在無形價值，一定有內傷，連investable嘅基本門檻，都令人懷疑。
要判斷一個市場係咪investable，非常複雜，最基本要睇政策環境，資金係咪有入有出？貨幣穩定？進而要有投資回報？估值相對回報亦要有優勢，亦要有獨特性，能夠做到分散風險嘅效果⋯⋯等等等等。假如投資者唔認為投資喺你嘅地方，唔能夠達到以上任何一項嘅賣點，基本上可以一蚊都唔投資入嚟，唔理究竟係外資定係自己友。即使經濟情況看似冇問題，變咗死場就好難再有人流。
香港主權移交已經26年，港股成為外資buy China嘅選擇。所以，減印花稅、打風開市，係唔會作出任何改變。要港股翻生，要麼中國故事再次變得值得信任嘅投資概念，要麼港股搵到另一個賣點。估值超平，可能係升跌周期不再出現嘅一個象徵。
晉佳
https://www.facebook.com/advanceguy1
註：專欄作家言論不代表本網立場
