近期高舉旗幟要積極打擊股票市場沽空嘅國家，豈止一個咁少？當中亦要數到韓國。
韓國嘅娛樂事業發展得非常好，股市卻是停滯不前，目前韓國KOSPI指數嘅市賬率0.91倍，喺主要市場指數當中，大概只有恒指嘅大約0.85倍更低。明明個國家好哋哋，點解估值如此低？其中一方面係金融危機影響社稷嘅歷史問題，令到當局對於外資起哂槓，要投資韓國要面對重重監管。而外資喺韓國，最近亦連續3個月淨沽出近50億美元。
早幾日韓國進行一項絕不受投資者歡迎嘅措施，直至明年6月，將禁止KOSPI指數同KOSDAQ 150指數股票沽空，禁止期間尋求改進規則同系統，亦提到全球投行存在大規模非法沽空行為。
禁止沽空會令到一個市場更趨六根清靜，又或者更趨波動，走向極端， 兩者都不是好事。六根清靜時，會趕絕投資者活動，導致買賣兩閒，反而成為他日股市上升嘅障礙；更趨波動嘅話，由於投資者唔能夠透過沽空去為流動性低嘅股票進行對沖，反而會加劇股票不問價實貨沽售，更易形成失序。
美國曾經短時間禁售沽空，2008年金融海嘯期間，美國證交會喺雷曼爆煲嘅9月份禁止金融類股份沽空，然後市場動盪並未因此穩定落嚟，最終大跌到10月尾。去到08年尾，SEC嘅前主席Christopher Cox坦言對禁止沽空嘅決定感到後悔。
禁止沽空嘅戲碼，喺美國或許成為尚方寶劍，未來仍有可能再度上演，但斷不會動不動對投資者落閘放狗。歷史似乎不會成為教訓，動不動視沽空者為敵人甚至由合法變違法，近年亦一再出現。
我哋成日聽到「由市場決定」呢句說話，越開明、越少非必要干預、同時維持公平，係股票市場最受歡迎嘅監管方向。將淡友視為國家級敵人，曲線表明呢個股市不能由市場決定，本來股票賺錢已經難，投資者唔能夠做決定就更加唔想玩落去，外資唔想玩，自然連自己人都唔想玩，估值自然低。
由市場決定，自然受市場歡迎，相信係小學雞都能夠明白嘅簡單道理。要反過來怪責別人眼晴不雪亮，貶低了估值，最終其實怪不了任何人。再講，所謂惡意沽空嘅人，有外資之餘，都一樣有自己人吧。
晉佳
https://www.facebook.com/advanceguy1
註：專欄作家言論不代表本網立場
