每位領導人上場至退下，總有功有過。對於剛逝世嘅前中國國務院總理李克強而言，大家自然聯想到「克強經濟學」，小弟就會諗起「棚改貨幣化」，令李克強成為內房泡沫爆破嘅主要推手之一。
回顧李克強嘅上一任總理溫家寶，任期前半段可謂順風順水，食正中國入世，成為世界工廠，狂賺外滙然後再推動內需，令中國富起來。直至2008年金融海嘯後，胡溫政權為救經濟推行「4萬億」，其後貨幣制度改變，後續更大程度上利用基建及房地產去推動內需以及經濟增長，亦導致內地樓價不合理急升。
李克強2008年擔任國務院第一副總理開始，大力推動棚改，2013年上任總理後，將棚改定為施政重點，亦衍生2015年嘅「棚改貨幣化」，由最初嘅實物安置及貨幣安置，改為貨幣安置優先，令房地產同貨幣供應掛鈎，本來窮到燶嘅棚改戶，有錢身痕除咗嚟香港掃包包、搶iPhone外，絕大部份由棚改收到嘅錢，又係去咗炒樓，令尤其內地三四線樓市火上加油。2017年初，李克強繼續堅持「棚改貨幣化」，揚言加快進度，指「過往8年有8,000萬住房困難群眾出棚進樓」，呢8,000萬群眾嘅購買力，何其壯觀！
正正喺「棚改貨幣化」大行其道期間，中國孕育出恒大、融創等內房泡沫，其中，恒大股價不足3年急升近10倍，其間資產總值由4,700億人民幣，短短3年升至1.8萬億，由泡沫正式變成巨型泡沫，負債比率300%樓上，老早資不抵債，禍根早已埋下。
直至2018年10月，李克強終於覺醒，表示要調整棚改政策，樓價上升壓力大嘅市縣，要盡快取消貨幣化安置優惠政策，但為時已晚。2020年初一場世紀疫症，令賣樓活動短時間停頓，觸發恒大、融創等等內房巨企資金鏈斷裂。
李克強嘅「棚改貨幣化」，催谷樓市同內需，將中國經濟高增長拉長幾年時間，卻換來更巨型嘅樓市泡沫，衍生嘅問題包括爛尾樓危機，至今苦無對策。李克強退下來之後，中國正面對GDP基數過高，房地產萎縮拖累消費、投資，加速地方政府債務惡化，GDP公式當中嘅C+I+G同時受創。所謂「克強經濟學」，原來有效期限就只限於自己任期內，其後李強接任，就變成「黑強經濟學」了。
晉佳
https://www.facebook.com/advanceguy1
註：專欄作家言論不代表本網立場
