兩年前，Netflix喺外界看淡之下，幾乎一注獨贏韓劇成功，Disney+大手押注、不成功便成仁嘅《Moving異能》，最近亦順利跑出。喺荷里活大罷工持續之際，只係講Netflix，今年Q4如無意外會有《魷魚遊戲2》同《京城生物》兩套重磅韓劇上架，如此看來，美資影視平台對於韓劇嘅依賴度只會更高。
美國汽車業、荷里活罷工顯得相央成趣，只不過，美國嘅競爭力一早不是單單來自美國製造，更多係利用他國嘅競爭力輸出全球，做好經理人及設計師嘅角色，iPhone冇幾多parts係喺美國製造，NVIDIA亦可以說是最強嘅設計師，Google、Meta發送緊中國以外嘅環球內容，亞馬遜賣嘅係全球嘅貨品，道理一樣簡單。
回想鴻海創辦人郭台銘早喺2018年預言，中美產業鏈有朝一日會幾乎完全分割，企業一係揀做美國生意、一係揀做中國生意，講到中一中。勢估唔到嘅係，自從TWICE周子瑜扯旗事件、薩德反導系統之後，中國祭出限韓令，以為韓國呢鋪死得？點知BTS、Blackpink先後喺美國大紅，而家韓劇更攻佔環球影視平台，人家Blackpink以至NewJeans都未到過大陸表演，成員一次又一次無奈地涉及辱華爭議，一樣活得好好。放眼全球，顯示出軟實力越強，越不受政治因素帶來產業鏈決裂嘅硬威脅所影響。如果韓流可以用股價嚟反映，相信2018年同中國決裂到而家，升咗十倍都唔止。
失去中國市場嘅代價，另一個係三星喺大陸嘅市佔率都急跌，地位準備由盈利單薄嘅華為手機取而代之。中韓貿易數據都顯示，年初中國首次成為韓國單月最大貿易逆差國，當然，韓國都要靠中國，剩下來就係要由中國入口必要嘅原材料。
呢種政治氣候影響環球貿易趨向以至投資取向，擁有軟實力、著重軟實力，機會就留畀呢類有準備嘅企業，仍會獲得投資者重視，喺好景嘅時候會跑出得越快。
不過，當分裂化越嚴重、對立雙方嘅依存度越低，激起進一步矛盾嘅成本變得越低。中美喺中東嘅角力冇停過手，沙特亦擺出希望食哂中美兩家茶禮嘅態度，結果究竟會點？亦係2024-2025年嘅重大主題，假如向矛盾一方進發，明年開始可能變成2018年嘅升級版。
大家近日聚焦以巴衝突，其實同時朝鮮䜋責美國航母抵達韓國，言論上亦搬出核戰爭作為威嚇。目前情況像極2017年，所以近排嘅環球升市，仲係持續嘅日子，的確值得大家好好珍惜了。
晉佳
https://www.facebook.com/advanceguy1
註：專欄作家言論不代表本網立場
