中美元首會面，不少媒體大力唱好中美關係改善。
回顧俄烏戰爭後嘅2022年3月份，中美元首曾經進行一次通電，一來俄烏戰爭觸發環球大跌市，當時中美再唔friend都要聯手釋出信心；二來，事後孔明發現，爆發國際戰爭後，中美作為全球最大國，兩位領導人必須有個公開嘅溝通，來表明一下雙方最官方、最表面嘅立場。
俄烏戰爭衍生嘅問題，就係疫後供應鏈問題進一步惡化，令通脹再升溫，然後美國更重手加息壓通脹，令全球齊齊面對高息、資產價格受創之苦，影響深遠，今次又點？
今次中美元首會面，時間點在於以巴衝突後、2024年1月台灣大選前，仲要幾乎同一時間，台灣大選藍白合成局，令藍營局勢突然佔上風。似乎，中美有乜都要喺台灣大選前講明。
美國政府高級官員表示，國家主席習近平及美國總統拜登兩人就台灣問題進行了實質交流，習近平向拜登表示，台灣問題係中美關係中最大、最危險嘅問題。換言之，中方第一步不容藍白合後，藍營勝選出現變數。至於國民黨候選人侯友宜訪美後，真係如部分分析所講，國民黨當選或成為美國妥協嘅方案？拜登只留下一句，要尊重勝選者。
今次習拜會，好聽就係雙方都唔想有矛盾喺呢一刻擴大（美股大升市中，全世界都要搵咗錢先，你自己唔搵呢浸錢，你嘅盟友都要搵），唔好聽就係約法三章，定下雙方牌面底線（不是最終底線），喺乜嘢情況下，唔好怪我唔俾面？假如雙方嘅其中一方，覺得對方不守今次習拜會留下嘅承諾，就會係下一輪矛盾嘅開端。
約法三章後，究竟邊一方會打破承諾？令矛盾加劇？或許應該反過來講，係邊一方覺得對方做出打破承諾嘅行為，進而成為下一步行動嘅理由？龍門嘅嘢，最後咪又係任搬。俄烏爆發，以巴爆發，下一個關注點就係台灣，明年台灣大選成為大關鍵，雖說藍白合後藍營勝算增加，但美國在關鍵個半月內，對於國民黨及民進黨取態，必成影響政治局勢以至股市關鍵。還看今日民調結果。
晉佳
https://www.facebook.com/advanceguy1
註：專欄作家言論不代表本網立場
