今個星期最吸引眼球嘅中國財經新聞，一定係大陸暫停公佈青年人失業率；而依然喺港股生存緊嘅股民，亦自然關注騰訊（700）業績。至於騰訊、阿里（9988）業績中，最值得關注嘅係：僱員人數不斷下跌。
兩單新聞絕不是冇關連。大家都知，中國樓市泡沫爆破，地方政府債務纍纍，發展到民企資管巨頭中植都爆煲，失業率上升、消費物價按年下跌（切記切記這真的真的不是通縮）、連帶消費都低增長、民間固投收縮⋯⋯喺咁嘅情況下，作為民企大佬，有否身體力行增聘人手，為國家撐經濟出一分力，係重中之重。
中期業績期仲未過去，最大兩間民企騰訊同阿里就已經公布咗業績，兩間公司嘅今年第二季收入，同疫情低基數嘅舊年第二季比較，分別升11%同14%。經調整純利升幅更多，達到高過預期嘅34%及48%。喺港股如此低殘嘅情況下，兩間民企業績勝預期本來可喜可賀，但除咗受惠疫後行業「輕微反彈」之外，背後多少歸功於縮成本，即多少有賴於裁員。
還記得年輕時聽過「股壇長毛」David Webb提到，要判斷一間公司嘅投資價值，最關注嗰粒數唔係盈利、亦唔係收入，而係首先睇僱員人數。僱員人數下跌，企業發展好極有個譜。對於一個大國而言，就業情況亦同樣重要。
今次港股中期業績開始咗一個月，恒指當中已公佈業績嘅藍籌民企、而又有披露僱員人數嘅，就有以下：
騰訊（700）截至6月底：10.44萬（去年6月底11萬）；
阿里（9988）截至6月底：22.9萬（去年6月底24.6萬）；
萬洲國際（288）截至6月底：中國4.5萬人（去年6月底4.8萬人）；
信義玻璃（868）（包括信義光能）截至6月底：中國1.42萬（去年6月底1.39萬）；
李寧（2331）截至6月底4,672（去年6月底4,591）；
京東健康（6618）截至6月底2,751人（去年6月底2,540）；
6間藍籌民企當中，有3間按年增聘中國員工，有3間減少中國員工。而減少嘅其中兩間，就包括中國最大市值民企：騰訊及阿里，可想而知中國科技行業嘅就業情況。
民企裁員之下，有幾個趨勢，未來可能喺中國發生：
一、民間投資持續疲弱，經濟動力要留給國企推動，但地方政府又缺錢，國企要利用自身財政能力去推動投資及就業。財政能力健全嘅國企，亦限於中移動（941）等等有限數目。於是最有機會能打破困局嘅賭博，就係由中央孭起地方政府債務，鐵索連舟。
二、持續影響就業結構，大陸打工仔慢慢會認為喺國企返工，好過喺民企返工。一來只有國企肩負國家任務增聘人手；二來，國企不會動不動裁員，打工仔逆市之下會慢慢只求穩定。
三、國企體制嘅薪酬及激勵制度，注定遠不及民企，對科技發展偏向不利，進而拖慢經濟復蘇進程。
至於騰訊、阿里不斷裁員，源頭係乜？咪就係「國進民退」，以反壟斷為由打擊權力可能過大嘅民型科技企業，而去到國家要撐經濟之時，大型科企被打到就嚟成為舊經濟產物，連馬雲都去調理農務了，有心都未必有力。
之前種下嘅因，會帶來未來嘅果，在此祝願復蘇路途之中作繭自縛嘅祖國，能夠吉人天相，早日重拾經濟動力。
https://www.facebook.com/advanceguy1
註：專欄作家言論不代表本網立場
