就嚟又到萬聖節，我曹老闆都好耐冇同啲後生仔女同事去蘭桂坊扮鬼扮馬，但係海洋公園嘅哈佬喂，就要俾下面行政總裁Ivan Wong去觀摩下。認識Ivan嘅時候，佢係UA院線嘅一把手，唔止喺香港大展拳腳，仲喺內地不斷擴充院線，只不過一個新冠疫情搞到戲院生意難做。搞開娛樂事業嘅佢被羅致去海洋公園做行政總裁，實在適合不過，攪嘅活動都貼地好多，見到佢喺萬聖節活動扮鬼扮馬就知啦。
入去今年呢個「園宇宙」之前，梗係要去海洋公園萬豪酒店嘅南海小館嘆番餐，呢度唔止點心出品精致，仲係順德菜館，啱晒我呢個順德佬，尤其順德拆魚羹，唔係度度有得食，要用人手將啲魚骨拆開，再起個靚湯羹。仲有香口入味嘅均安煎魚餅，順德係魚米之鄉實至名歸。
講開萬聖節，恐怖電影實有「不給糖就搗蛋」（Trick-or-treat）情節，話說呢個傳統來自16世紀嘅英國，不過之後就傳到去北美發揚光大。查實現在美國的外交咪就係用緊Trick-or-treat，OPEC早排話每日減產200萬桶石油，美國總統即刻出treat，話要釋放美國1,000萬桶戰略儲備石油，不過呢個數目人哋五日就已經抵消咗，真係搔不着癢處。自從石油從黃金計價轉成美元，油產國「畀糖」美國都好多年，而家係要自已油價自已話事。
