特首李家超又開始為任內第二份施政報告進行諮詢，但巧婦難為無米之炊，政府連續多年財赤，賣地成績又唔理想，不是流標，就是低價批出土地，出口數字又低迷，截至6月底止，政府本財政年度首3個月整體開支1,761億元，收入742億元，計入綠色債券所得466億元收入後，就錄得赤字553億元。政府確有必要尋找開源之法。
早幾日老友邀請出席一個外國記者會舉辦的午餐會，主講嘉賓紀惠集團行政總裁湯文亮就特別提到賣地問題，話地產市道唔好，賣地成績自然唔理想，其實只要政府撤辣，交投暢旺，樓價上升，政府賣地自然賣到好價錢啦。曹老闆就覺得，除了減辣之外，亦要密密賣地，唔使理個周期，咁庫房收入增加，政府又多啲錢進行工程及推行新政策。
事實上，政府近年使錢愈嚟愈多。香港的公共開支佔本地生產總值，由回歸後1997-98年度的14.13%增加至2019-20年度的21.79%，於2022-23年度更攀升至28.44%。2021年，香港的政府總開支佔本地生產總值約為24%，相比加拿大、英國及法國分別為39%、45%及54%嘅比例為低，但這些均屬高稅率國家，香港人當然唔會想加重稅。
若扣除國防開支，2021年美國的總公共開支佔約GDP約26%，與香港嘅24%只相差約2%。若唔再改善吓香港財政情況，香港好快就似啲西方國家要舉債渡日啦。
《基本法》第107條規定，「特區政府財政預算以量入為出為原則，力求收支平衡，避免赤字，並與本地生產總值的增長率相適應」。政府考慮增加公共開支嘅同時，睇下點改善本港營環境，增加庫房收入更為重要。
賣地係政府主要嘅收入來源，地價收入與本港房屋及土地政策息息相關，對本港經濟影響舉足輕重，故此，港府就推行任何跟房屋或土地有關的政策必需經過慎密思考，避免窒礙市場健康發展。政府應考慮湯博士嘅建議，早啲撤辣，就自然增加政府收入啦。除此之外，民間提出不少方案，例如補地價發展住宅項目，唔該政府喺基建及政策方面配合一下，自然有唔少補地價收入。
另外，利得稅佔政府總收入超過26%，大企業投資同經濟活動相當重要，有助刺激經濟，增加庫房收入。大企業及高收入人士作投資或消費，因涉及較大額資金，可產生的乘數效應亦大，出現「水漲船高」的效果，有助增加GDP，幫助市場「做大個餅」。所以，政府有必要更積極「搶企業、搶人才」。
最後講下今次午餐會地點，佢地西餐廳團隊其實主要來自半島酒店及淺水灣酒店，自然有米芝蓮質素，前菜牛油果蕃茄夠晒健康，賣相又相當精緻，值得一試。
曹參國
註：專欄作家言論不代表本網立場
