香港地寸金尺土，但係政府搞咗個「港人首次置業」計劃，啱啱喺荃灣油柑頭有塊首置地截止投標，點知只係得一間唔係好多人識嘅佳明集團（1271）入標，全部出名嘅地產商都躺平，究竟點解搞得香港有地冇人買？
喺截止投標之前，唔少專家學者都唱好呢塊地話係嚟緊樓價地價嘅指標，依家真係屋漏偏逢連夜雨，香港嘅樓市身子弱到不堪一擊。呢單嘢震驚中環嘅係，大地產商全部失晒蹤，即係話佢哋全部都唔睇好樓市，唔敢喺市況低迷嘅時候用真金白銀去投資。原本特區政府諗住今年嘅賣地收入有850億，繼續冇人落標同流標嘅話，依家可能真係18億都唔知有冇。
睇返今次肯落標嘅佳明集團，市值都不過係66億。計我話呢次最後都可能係流標收場，因為油柑頭呢塊地估值18億到36億，仲要計埋建築成本，呢個標對於佳明嚟講未必啃得落。加上而家息口咁高，內房股輪住爆雷，邊有銀行肯借咁大條數出嚟。負責賣地嘅發展局應該都幾頭痛，嚟緊應該要大幅調整賣地嘅策略同埋底價。
我曹老闆喺香港會聽到，連彭博都喺度吹風，香港喺今年第四季同明年開始，地產商會收到大量樓花撻定個案，唔好以為而家落咗飛嘅小業主真係會捱落去，呢個骨牌效應唔係嘢少。
至於呢塊地加咗「首置」限制，但呢啲變種公帑資助，到喉唔到肺，真係有能力買樓嘅又使乜政府幫手，以為攞到公帑嘅資助隨時變咗負資產。「首置」話係幫啲買唔到樓嘅香港市民，又要從來未擁有過住宅物業，仲要過到入息同資產限額審查，買咗個單位五年內唔可以賣出或者租畀人，將來就算升咗值都要補價先至賣出。
咁不如揀長實個盤，用返七年前嘅九龍市區樓價開盤，呎價仲隨時平過居屋。睇嚟大發展商都係走為上策。「檀公三十六策，走是上計。汝父子唯應急走耳。」誠哥父子眼光勁過古人。而家私人樓仲平過呢啲資助房屋，變種公帑資助係時候要寫落歷史記錄。
去到香港會除咗收風，同埋睇吓見唔見到啱啱做咗會員嘅政務司司長陳國基去幫襯，當然仲要試吓佢最出名嘅牛扒，牛味十足，煮啱啱好夠肉汁，香港會果然係最難入嘅會所。
曹參國
註：專欄作家言論不代表本網立場
