香港人上深圳吃喝玩樂，已經唔係新聞，上大陸玩，想舒服啲就一定會坐滴滴，而且車費比走香港坐的士或者Uber都抵好多。不過唔知有幾多人坐滴滴時，會同啲司機傾下當地經濟？
在公在私，我都會去大陸唔同城市，坐滴滴有時都會主動同啲司機吹水，當然包括深圳。問過六至七個滴滴司機，普遍對經濟前景傾向保守。至於電商平台定價更平，喺美國上市嘅拼多多（PDD），同香港上市嘅阿里巴巴（9988）同京東（9618），將3個嘅股價圖拼埋一齊睇，PDD真係好好多。
舊年年頭好多人都講《推背圖》，尤其嗰句「黑兔走入青龍穴，欲盡不盡不可說」，更加係街頭巷尾一齊解讀。黑兔臨入青龍穴，4條3（恒大）被香港法院判咗破產，講真大家都預咗，但預咗還預咗，計數還計數，4條3啲爛帳都要處理，唔止公司報表入面嘅爛帳，老細佢自己有無啲私人數用公司股份做抵押之類，有嘅話條數有幾大，或者有無其他借貸協議，無人知。但公司無值錢資產冚數，股份停牌唔知重有無機會復牌，即係連啲股份都隨時唔值錢，咁大家真係完全計唔到數，就會好頭痕。
總之，呢一年，唔好亂投資，唔好亂辭工，盡量做好準備，the winter has come。
金缸經
註：專欄作家言論不代表本網立場
