每年到農曆新年，點少得逗利是吖，隨住電子錢包「普及」，我哋逗利是既可收實體，亦有電子形式。不過點解要括住「普及」，Sorly Sorly，電子錢包普及係講內地嗰邊，唔係香港，香港極其量只能算電子支付開始普及；但諗諗下咁講都唔算好貼切。
問下大家：「Payme、Apple Pay、Google Pay、支付寶，同埋微信支付，有幾多人用緊兩種或以上呢？」香港所謂電子支付，幾乎同八達通畫上等號。睇返2023年6月報道，運輸及物流局數據顯示2022年，八達通喺鐵路、巴士、渡輪費用支付佔比超過9成。單睇2019至2022年，佔比重逐年增加，由2019年85.4%，增至2022年90.6%。
咁樣到底對消費者嚟講，係好事定壞事呢？要回答不妨先睇睇八達通控股有限公司股權分布，喺八達通網站企業架構頁面顯示，由四名股東持股，分別係MTR (64.02%)、KCR (22.10%)、KMB (13.83%) 同埋新渡輪 (0.05%)，MTR和KCR同屬港鐵 (0066)，所以港鐵係八達通最大股東，佔比高達86.12%，所以八達通喺香港公共交通工具支付市場無異於壟斷格局。
點解內地電子錢包極為普及，香港推動電子錢包發展咁多年依然停滯不前，八達通都有份造成。表面睇，八達通控股有限公司係私營機構，自然要以自身利益作首要考慮，但實質定位上值得反思。港鐵作為大股東，揸住八達通超過86%股權，而港府財政司司長法團又揸住港鐵接近75%股權，八達通公營色彩非常鮮明。
金缸經
註：專欄作家言論不代表本網立場
