「買唔買樓」呢個問題，喺市升嗰陣根本唔係問題，因為絕大部份人都有個升值預期，嗰陣你問嘅唔係買唔買，而係「點先買到樓？」
而家樓價跌咗唔少，好多人買樓嘅問題就會變咗「唔知聽日會唔會平啲？」，早買係咪早享受唔知，遲買分分鐘平半球，所以撤辣前，香港二手樓市就係處於一個無成交，但一成交就劈價嘅情況。政府撤辣後，樓市會唔會轉勢？都係睇大陸同外國資金重有無湧入嚟。但如果你純自住，樓價主要影響你供樓負擔，同埋買完嗰下有幾多現金流。
講到供樓，除咗樓價當然就係睇利率，而家美國聯儲局都打開口牌，講話今年減息，雖然香港唔一定會即跟，但至少你計到數，供樓成本唔會再增加先。計到數呢樣好重要，因為樓嘅流動性低，你一計錯數，有咩依郁供唔到又甩唔到就好大鑊，所以息口見頂，對買家絕對係好事。
呢刻如果真係要買樓，一手樓都抵過以前好多，以前啲發展商唔憂賣，開價進取。但近期睇返啲上市地產商業績，減債、套現基本上係主旋律，潛台辭即係唔會咁惜售，唔會咁進取，所以啲發尾商呢排都積極推盤，九龍灣同啟德係重點，尤其啟德，吹咗咁多年嘅輕軌似乎重現曙光，交通便利提升，加上嗰度嘅景真心無敵，趁住個市同發展商情況麻麻，而又計到數負擔到，真係值得諗諗！
金缸經
註：專欄作家言論不代表本網立場
