聽聞大台有套劇叫《妳不是她》，當你望住港股，再睇下美股，簡直係現實版《妳不是她》。
2012至2023年呢12年，用2017年做分界線，之前只係2015年跌7.16%，其餘咁多年都升。2018年開始行衰運，到2023年只係2019年彈過9.07%。套劇結局係返去原點，港股跌咗咁耐，都唔知原點喺邊。
嚟到2024年開局，都唔求好似美股咁繼續欣欣向榮，A股至少都彈咗1日，但港股除了第一個星期日日跌，去到第二個禮拜嘅星期二，開市唔夠一粒鐘恒指升咗190點，以為叻仔啦，點知收市都要跌34點，港股真係終極跌錢黨，玩得預咗跌錢。
上星期大陸有條短片，有兩句對白被網友截圖，變成近期廣為流傳熱點：「無論你上輩子造了甚麼孽，只要這輩子炒A股 你就算還清了」。無耐網上流傳港版截圖，將「A股」換成「港股」，計我話，買A股還上世孽嘅話，買港股簡直還三世。呻還呻，港股係咪完全無選擇？恒指六日連跌之時，重有8隻籃籌逆市造好，佔82隻成份股唔夠一成，明顯係滄海遺珠，當中5隻係能源相關股份，包括石油股、煤碳股、燃氣股和電力股，都係中資股。
如果你驚唔穩陣，可留意下8隻中唯一非中資股滙豐控股 (005)，截至2024年1月9日收報63.45元，較舊年7月底65.20元約低2.7%，不過同期恒指蒸發近3,900點，累跌近兩成，滙豐展現非凡抗跌力。舊年首三季賺近226億美元，較2022年同期增逾1.2倍，亦創同期新高；並喺舊年已恢復派發季息；更重要係外資絕不抗拒投資滙豐股票，應該係舊年8月至今股價表現穩定主因，面對歐美持續積極減少對中國市場依賴，同時大陸內需疲弱，中資股業績不明朗因素增加，如果啲錢要喺港股搵位泊，資金流入滙控機會進一步增加。
現時匯控股息率 (TTM) 約6.5厘，超過5厘已重新躋身高息藍籌股行列，配合美國今年稍後時間會進入減息週期，有利美國經濟表現，滙控北美業務會受惠，今年整體業績表現仍有進增空間，股價首季可以睇70.00至72.00元。
金缸經
註：專欄作家言論不代表本網立場
