喺香港，花生就係流量密碼。
香港係一個好奇妙嘅地方，嗰種奇妙係解釋唔到。細個嗰陣有對孖女組合，一炮而紅。間唱片公司梗係食住條水，再推個孖仔組合。但孖仔拆夥後，其中一個真係唔知做乜，近年是非纏身，同個老婆喺社交平台鬧得熱哄哄，曝光率不比偶像組時低。
近年大陸啲債務問題，鑊鑊新鮮鑊鑊甘，爆完內房，最新爆埋富人俱樂部中植，但香港大把人都係當花生咁食，食食下又搵埋香港啲發展商嚟比，想像力相當豐富。啲內房一路玩緊用薄利貨如輪轉，維持現金流，我都幾相信成行喺好景嗰陣，用非常樂觀態度做budgeting借錢。如果唔係大陸先後喺2021年正式推出三條紅線，2022年將防疫玩到極致，撳熄咗成個經濟動力，內房都未必死得咁快。
香港啲發展商玩法就唔同，尤其大隻嗰批，起樓賣樓基本上確保一定利潤。過去十年，啲人成日口口聲聲講地產霸權，某程度上就係話地產商賺到盡。香港發展商啲負債情況普遍好過內房，營運效率又有一定保證，而家內房出事，突然就講到香港發展商好似紙糊咁，一篤就穿。
講到香港樓市，另一個流量密碼就係開增值稅，好多人都驚緊政府係咪真係會咁做，又話一定會樓市大冧。但你要做得成交易，首先要有買家同賣家。假設真係立法，賣家一定會想喺立法前甩手，但買家知道未來甩手都會有一大筆成本，透過買樓發達基本上無行，你呢刻如非必要係咪重會買樓？你又會唔會願意用現價去買？
立法之後，賣家知道個賺幅會被大幅蠶食，重有無咁大誘因賣樓？當價格有落差，如非買賣雙方有特殊理由買賣，香港樓市隨時比一大堆辣招時更冰封。至於樓價既變動，唔單止影響後面嘅財富效應問題，亦都會影響銀行盤數同啲貸款質素，要喺經濟衰退時維穩，呢啲先係政府睇嗰盤數。
當然無人買樓，可能對一手樓銷情實有影響，咁到時就要睇邊個轉型得快，可能發展商變身輕資產，賣BRAND幫人營運商場之類可能反而有着數。
金缸經
註：專欄作家言論不代表本網立場
