財政預算案重頭戲，一定係嗰堆乜乜SD，物物SD，終於嚟到盡頭。講真話意外唔意外，雖然政府一路無乜特別吹風，但地產商同代理一早嗌哂救命叫撤辣，重講到唔撤辣樓價再跌有政治後果咁嚴重。無他，預算案公佈前夕，差餉物業估價署公佈，今年1月私人住宅售價指數連跌九個月，累計跌13.5%；若果同2021年9月高峰期相比，更跌咗23%。
啲業主畀買家撳住砌咗差不多一年，撤辣咁高興，再加埋金管局放寬埋啲壓力測試，梗係一嚟即刻反價，想攞返主導權，不過，撤辣只係降低咗買樓一部份成本，要真係個樓市回復返上升動力，除咗本地買家，都要靠外圍局勢好轉，先令啲港樓跌唔落。唔敢妄下判斷話香港樓升唔返，但至少要等成個局面好返啲，唔係一撤辣就可以恢復。
而且個樓市咁殘，傷嘅點止業主，連堆地主都傷。銅鑼灣地主舊年都重要蝕8億幾，重要減派息，管理層都講明，預期今年本港及全球經濟環境仍不明朗，削減派息為未來做好準備。主攻內地嘅恒隆，喺業績會時都講而家係保本保命，唔係大發展時期，所以真係唔好對撤辣有太大期望。
喺經濟大洗牌下，啲地產商都各師各法搵出路，適逢業績期，只要啲地產商條數無差到，就已經算做得好。減派息當然對投資者嚟講係壞事，但從企業角度睇，都係一個保命方法，喺高息同緊縮環境，減債，留現金係重中之中。
註：專欄作家言論不代表本網立場
