上星期一股寒流令俄羅斯西伯利亞低見過零下62.1度，正想唱返句「我是一個西伯利亞人，冬天的冠軍」，點知寒流呢個星期殺到，星期二香港得返6.3度嘅入冬以來最低溫度，同上星期五差成20度！不過如果你炒開港股，呢啲天氣簡直濕濕碎，2024年過咗未夠一個月，差唔多日日冷水照頭淋。開局首日恒指相繼失守 17,000和16,800點後，再連跌6個交易日，以為16,000點有支持？傻豬連15,000點都隊穿過，短短15個交易日，跌足13日，唔單止香港老散玩港股玩到心都寒埋，南韓投資者買國指ELS輸到攤攤腰，連坡佬基金都公開認錯投降，側面睇，香港重係一個國際金融中心，未變遺址，唔係邊會跣到咁多人。
星期二得6度，凍到咁反而入咗冰箱嘅港股回暖彈返390點，不過連舊年9月以來一直強勢嘅比特幣，近日都哀鴻遍野，買比特幣都被潑冷水。之前環球投資者等到頸都長嘅現貨比特幣ETF，喺1月10日終獲美國證監會批准推出。
比特幣價格翌日高見48,923.70美元，較上日升近半成，你以為美國證監開綠燈，會有大把相關ETF湧入比特幣市場，價實會升到飛天啦，點知又係趁好消息出貨套路，加上市場預期3月美國減息現已幻滅，債息和美匯雙升，截至1月22日比特幣收報39,556.4美元，失守四萬關口，唔使兩星期由高位計無咗近兩成，去返舊年12月初水平。睇返比特幣由33,000美元升兩成到39,000美元，係舊年10月24日至12月2日，歷時差唔多一個半月，「升慢跌快」特性明顯。
回咗咁多，梗有手痕友想知入唔入得過，現時香港上市有兩隻比特幣ETF，就是FA南方 (3066) 和FA三星 (3135)，喺比特幣由高位回落近兩成期間，相對跌幅為13.35%和12.88%，差距不大，不過FA南方交投明顯活躍，證明較多散戶玩，ETF價格可能都會波動。市場估緊美國最快5月減息，唔排除比特幣回到35,000至36,000美元之間先有支持，所以不論買入邊隻ETF，最好都係等下。
金缸經
註：專欄作家言論不代表本網立場
