3月業績期總算完結，各大上市公司財務、業務、投公關等部門忙到七彩後，應該總算可以唞下氣。但一眾分析員仍然有氣無碇唞，因為而家好多大行都炒人，Research呢啲Cost Centre好少可以幸免於難，縮team就唯有一人睇多一隻，再剔走啲唔睇，呢個經濟情況大家都難捱，大家都要加油。
而且港股真係好難玩，以前啲公司業績差少少，股價跌5至6%算係好嚴重，而家閒閒哋都要跌一兩成，好誇張。但無計，香港股市無以前咁疊水，有限錢去揀二千幾隻股票，好似玩音樂椅咁，100個人得30張櫈，業績收入或盈利差啲、派息少啲、業績指引低啲、債重啲、求其一樣都可以畀人掟到傻。
股海風高浪急，唔想落場玩，喺側邊食下花生都過癮。早前大股東周大福企業嗰邊出手買佐丹奴不成，近期又要出招要重組董事會，炒主席，再放家族成員入局，呢啲上市公司都幾JUICY。但做咩事玩開百億千億企業級別嘅家族，突然對一間30幾億市值出手？無錯佐丹奴係高息股，現價股息率有成15%，但截至2023年底佢銀行存款都係得9.35億港紙，就算再用返之前個價每股1.88港元去收購，PE都要8.7倍，重高過第一季升咗近4成嘅中海油，而且香港Fast Fashion競爭咁大，以前就話主要同波記佢哋爭，而家同Uniqlo，Zara，H&M爭，業務前景都唔見得好好。
究竟大股東周企點解要咁執着炒主席，真係有啲耐人尋味，因為嚟緊要開個EGM搞，睇面嗰浸，大股東嗰邊手上揸24%多啲股權，之前反對過全購嘅David Webb揸近6%貨，兩間獨立投票顧問又建議股東反對罷免動議，數股票定數人頭，通過機會都係一半一半，而且佐丹奴啲貨咁散，你想做LOBBYING都唔知點有效去做。所以呢單嘢做上市公司嘅朋友可以睇實，無論成功失敗都有嘢學到。
金缸經
註：專欄作家言論不代表本網立場
