零售超市百貨公司Target（TGT）一個月內兩次調低營利預期，原因為庫存量激增無法去貨，預計需要做多幾次減價，亦即要犧牲短線盈利，令股價一度跌7%。但零售商之死，似乎帶出一個聯儲局樂見到的訊號，物價終於順其自然地回？
先睇Target更新的指引，預期第2季經營利潤由早前大約5.3%，大幅縮減至2%，慘過喺香港開荼記做飲食，街邊賣魚蛋更好搵。
如果減庫存順利的話，Target指預期去到秋季，經營利潤會反彈至6%，一個高於平均的水平。至於全年收入低至中單位數增長，但其實計埋通脹就等於無升過，最後就加多句話會維持及增加市場份額。
點解話Target提供一個通脹降溫的論述？首先集團公告講到清貨行動，會透過額外減價及取消訂單來達成目標。其次就係公司提到對於食品或必需品以外的種類，會採取保守計劃，前後兩件事均反映後疫情的需求，終於都降溫。
今個星期五的美國核心CPI預期為按年升5.9%，按月升0.5%，如果數字進下跌去印證Target大減價的通脹見頂論述，9月聯儲局真係有機會停一停，抖一抖。
