科技股受加息洗禮，先有Netflix流失觀眾，再有DocuSign業績不似預期後大冧。面對股價不濟，唔少Tech股都想試圖說服市場，未來仍然有強勁增長，包括Spotify十年後的千億收入大計，以及ARK出報告話最大持倉Zoom，將來有近1億人每月課金200蚊港紙。
先講音樂串流平台Spotify（SPOT）近日舉行Investor Day，奇怪地無將份PPT獨立拆開畀人下載，而係要睇4個鐘的presentation。
會議當中的預測相當大膽，2030年前達到10億用戶，10年後的收入達1,000億美元，對比目前僅有1.82億用戶及118億收入，講緊需要10倍增長。
管理層同時仲預期唔錯的盈利能力，分別有40%毛利率及20%經營利潤。能夠達到千億收入及盈利能力的，最細隻的Verizon（VZ）市值都有2,000億，對比今日只有200億市值的Spotify，想像空間定幻想空間就任人演繹。
當中比較可取而容易消化的，可能就係用戶平均收入ARPU，長遠將達到100歐元，或者係830港元，每人每月69蚊港紙。當然啦，後半部份就係要搵到10億人訂閱，即係全個地球每8個人就有1個用Spotify，即使無對手亦都唔容易。
同樣出名進激的ARK研究，預期最大持倉Zoom（ZM）2026年最淡都到700美元。原因係將來會有量工作人口同Zoom遞距辦公，最淡9,000萬人用，最好就1.8億。
問題就係預期用戶平均收入310美金起跳，大約就200蚊至最多280蚊港紙一個月。而同樣的budget，夠開個Google Workspace或微軟365﹐就乜功能都齊曬。
