本欄早前提到油價或油股在上海解封消息後，短線難有更好消息，想買西方石油（OXY）都不妨等到60蚊，等睇部份事件開始明朗化再研究。
首先供求角度，OPEC+周二發表的5月報告證實所謂增產油，不單止杯水車薪，更加可能因為部份成員國問題，例如有報道指利比亞持續局勢動盪，產量由每日120萬桶，縮到得個零頭10萬桶油。
所以OPEC 13成員國實際上5月份每日生產2851萬桶油，較4月少每日17.6萬桶油，延伸更大疑問係預期第3季及第4季，分別每日出2965萬桶及3035萬桶油，即進入冬天前要較現時搵多每日184萬桶油產量，可行性究竟有幾大係疑問。
而實際上，有空間或者有方法提高供應的只剩沙特及阿聯酋，變相就要從新故事角度去睇。
話說美國總統拜登競選時曾經講過，要令沙特變成一個令唾棄的國家，結怨原因為沙特實際掌權人物王子殺害美國記者。從該王子的角度，就認為該位記者其實係沙特王室中人，清理門戶咁解。
最終事件就好不愉快，先有拜登唔聽王子電話，到最近油價貴一貴時就到王子唔聽拜登電話。而偏偏白官就話拜登將於7月飛去見沙特王子，就應該叫做無事不登三寶，順利見得成的話﹐相信對於油價應構成壓力。
個人操作︰
均價61.5元買返， 計劃係單日有5％兼拋離均價的話會即日食咗先講。中長線就睇油價會挑戰一個需求摧毀的階段，中間仍然有唔少機會，直到市場同意出現經濟衰退時，油股先會斷攬。
