以標普500期貨計，在通脹數據CPI公佈前後3日累計7%，令美股再次由高位跌夠兩成步入熊市水平。
CPI報告關鍵一詞board base，指物價向上並不局限於油價變貴，而係全方面向上，交易員估緊下次會議加息75點子，而大行高盛就預未來3次會議加50點子。整體市場主題就圍繞住只有經濟衰退，才能壓倒通脹。
根據Factset整合數據，分析師仍然預期標普500指數盈利2022年全年增長約10%，明顯並未反映下半年經濟轉差的環境。
若然如此，根據最準淡友大摩的Mike Wilson睇法，現時大市仍然未反映，一個無增長時期的估值，按股票風險溢價水平衡量仍然未算吸引。
股票風險溢價即係，買股票比起買「無風險」的國債相差幾多。現價咁計，標指3900點，預測2022年指數盈利為約240元﹐即係16倍PE或6.25%收益率（earning yield），減去10年期國債3.22厘，得出股票風險溢價係3.03厘。
問題就係3.03厘的風險溢價算唔算抵呢？根據2020年疫情高位、0809年金融海嘯水平，大市跌到令風險溢價要去到7厘先見到底。
換言之，要令投資者覺得個風險係值博的話，標指要跌更多，而同時盈利唔會大跌。大摩的基本盤就睇標指預測14.6倍PE（6.85厘收益率）就係一個合理水平，假設風險溢價去到3.7厘及10年債息3.15％。
如果對上述的過程無興趣的話，簡單講就係睇標指3400點，而假設盈利無變，7厘風險溢價就要見2200點。
