美股受地緣政治及高通賬雙重夾擊，指數期下試1月24日小奇蹟日低位，納指100期貨一度跌1.3%後收復失地。整體跌市原因更大可能係借勢調整，繼續淘汰部份不合市場口味個股。
第1個跌市因素，先講俄羅斯準備入侵烏克蘭影響，根據往績，美國無份直接參與嘅戰爭，對美股影響相當有限及短暫。
再提一次LPL Research整合過去80年地緣政治事件對股市影響，發現平均的單日跌幅大約1.1%，平均累跌4.6%。唔計珍珠港一役的話，國際衝突對美股影響有限，2000年後就只得911事件前後拉低美股11.6%，之1個月就收復失地。
第2個跌市因素，高通賬引致市場猜測聯儲局緊急加息，一度有傳話唔等3月中啦，2月14日即係今日開緊急會議決定要加？NO!
睇返紀錄，聯儲局一向都有類似會議，例如1月14日及1月18日，並不是臨時或緊急加開嚟傾加息。至於話，聯儲局可唔可以就喺2月14日決定加呢？唔係話唔可以咁做，但實際可能性偏低。
目前市場繼續就各個儲局官員言論畀反應，今年有份投票Bullard意指3月加半厘，2024年先投票嘅Daly又話唔perfer，覺得唔使咁激。就算周三出會議紀錄﹐都係講緊上次個會，仍然係唔明朗。
今輪調整應該要睇乜呢？
以100億樓上個股作統計，當中有大約2成個股自1月24日後繼續插水，從股價該彈不彈反映被市場離離，包括有Lucid、Paypal及Doordash等，最少跌多10%以上。
贏家就則有唔少商品股，鋁業股AA、油股OXY及鋼股NUE，自1月24日後衝高3成以上。
當然係有一部份，畀市場殺錯嘅科技股如BILL、DDOG及SNAP都係有份彈， 不過仍然差52周高位一段。
換句說話，如果真係要buy the dip的話，一味跌得多，跌得殘未必有用。唔講油股或者銀行股呢堆大家都知嘅板塊，食品及農業downside唔高，屬於唔想揸現金嘅選擇。
值得留意事件︰
2月14日︰聯儲局例行會議之一
2月15日︰原油庫存
2月16日︰FOMC會議紀錄 PPI 生產者物價指數
2月17日︰聯儲局官員Bullard & Mester演講
2月18日︰聯儲局官員Wallard, Williams, Brainard演講
