之前講到業主余生要求知道買家身份，作為雙邊代理嘅我哋必須透露。同事Amy馬上面色大變，口震震不知所措；而我就故作驚奇地問佢：「咁奇怪嘅，點解你唔賣畀佢？因為呢啲工商舖物業全部都係商品，賣嘢應該睇價錢㗎嘛。」
「姓李呢兩公婆阻咗我幾十年，朝朝同佢鬥早，否則會畀佢霸住我舖前面個位置，令我長期受精神折磨！而家我再冇體力做落去，所以索性關門賣舖退休了結心事。我寧願賣平啲比其他人，都唔會益佢！你問咁多嘢係咪畀我估中咗真係佢買，如果係你可以走啦！」李生好氣憤咁講。
聽完後我緩緩地說（老師教落，對方越急我哋越要慢）：「余先生請冷靜地聽下我講，首先唔好動氣住，會傷身，冇人值得你唔開心，無事值得你唔快樂。我老闆教落，人生除咗生、死，其他都係小事。我哋先唔談論邊個人買，店舖買賣應該建基於商業做決定。
我舉個例，假設有人出1,900萬想買（你間舖），而你隔離李生出價到2,000萬，咁你賣俾邊個？」稍停一下讓他思索片刻後續道：「如果你都係選擇1,900萬嗰位，我替你可惜 ，因為你選擇同錢鬥氣。如果我係李生，佢搵個朋友同你1,900萬買入，再以買賣公司形式賣番畀李生，仲着數咗，先付厘印費7.5%（現在是3.75%），再以買賣公司方式轉讓只需畀0.2%厘印費（現在是0.26%）」，李生首先買平咗100萬，厘印費再慳多幾萬蚊添（以2,000萬計算）。除非你呢世都唔賣，否則佢用呢個方法買你『吹佢唔脹』。」
余生開始沉思，我亦乘勝追擊：「你係榮休賣舖套現，唔係求氣。況且余生你哋呢輩人對香港付出咁大貢獻，亦係時候止賺，策劃人生下半場好好享受下呢個世界。商舖只係商品之一，等於放股票，畀到價你咪賣囉，唔使理邊個接貨㗎。」
最後當然要同佢分析利害關係：「老實講，呢啲非核心區舖係佢哋（李氏）先願意咁爽手同你買啫，如果你要等其他投資者買，就算睇啱咗，出價都可能低幾百萬，到時咪拖住你時間！唔好再猶豫啦，快啲搞掂佢同你老伴去周遊列國享受下啦！你唔顧自己，都要顧下太太感受㗎嘛。」
余生聽完我分析之後仍有點半信半疑，追問我如果李生真係用「買賣公司」方式轉售畀自己嘅細節，解釋過後我再提供附近嘅舖位成交資料畀佢做對比，證明佢呢口價錢賣得非常好，余生終於肯面對現實順利簽成。
以為只係win win 雙贏？No No…
意想不到嘅係，之後余生同李生商議交收狀況傾得好投契，仲和好如初，最有趣係雙方都後悔點解以前嘥咁多時間去嗌交，更發現好多誤會都源於大家冇溝通。後來余生經常落舖探李生李太，仲做埋好朋友結伴去旅遊㖭。
故事原來仲未完——最驚訝嘅係原來雙方仔女已經暗中拍咗幾年拖，兩家冰釋前嫌後戀情終於可以曝光，之後做埋襯家，擺酒仲請我同Amy去飲添！
所以，這是一場四贏嘅Happy Ending！
鄭得明 利嘉閣地產商舖部高級營業董事
——————
